Safet Gjici “driblon” deklaratën e presidentit të Partizanit, Gazmend Demi. Një ditë më parë, kreu i klubit të kuq theksoi për “Panorama Sport” se Partizani do të dalë kampion, por jo me arbitra si Kukësi. Në fakt, polemikat në distancë lindën pas prezantimit të trajnerit të ri të Kukësit, Mladen Milinkoviç.
Mirëpo, duket se “luftën” presidenti i Kukësit nuk e ka vetëm me Demin, por edhe me Grigor Tavon e Luftëtarit. Ky i fundit shpërtheu në akuza, duke paralajmëruar se do e padisë trajnerin Milinkoviç, pasi ka firmosur me Kukësin, duke qenë nën kontratë me Luftëtarin.
“Për kontratën e trajnerit e keni përgjigjen në Federatën Shqiptare të Futbollit”, ka thënë shkurtimisht Gjici. Mirëpo, te Kukësi ka edhe një çështje tjetër brenda klubit, pikërisht ajo e kontratave, e cila po shqetëson më së shumti Enea Koliçin dhe Izair Eminin.
Por, klubi nuk mendon kështu, edhe pse lojtarët kanë bërë kërkesa për t’u larguar. I pyetur për këtë çështje, Gjici është i bindur që marrëveshjet janë të rregullta. “Aty i keni kontratat, si për Koliçin dhe të gjithë lojtarët e tjerë.
Në FSHF mund ta gjeni kollaj, por jemi gati të vendosim edhe juristin në dispozicion për të sqaruar gjithçka”, përfundoi presidenti Gjici, i cili tashmë pret që klubi i tij të nisë me trofetë nga Superkupa. Finalja me Tiranën e rënë nga kategoria do të luhet më 6 shtator.
SKERIDLAID SULOZEQI
NDIQE LIVE "PANORAMA TV" © Panorama.al
