Një varr masiv me eshtrat e 215 fëmijëve është zbuluar në Kanada në një ish shkollë indigjene, e cila është ndërtuar për të asimiluar njerëzit autoktonë.
Euronews.com shkruan se zbulimi i eshtrave pranë shkollës së Kamloops u bë i mundur pas ekzaminimit të vendit me radarë depërtues.
“Ne kishim informacion rreth komunitetit tonë dhe i kemi verifikuar. Me sa dimë, këta fëmijë të humbur janë vdekje të padokumentuara”, tha Rosanne Casimir, drejtuese e komunitetit Tk’emlúps.
Shumë nga eshtrat e gjetura i përkasin fëmijëve deri në 3-vjeç, ndërsa shkaqet dhe koha e vdekjes së tyre nuk është mësuar.
“Për momentin kemi më shumë pyetje sesa përgjigje”, shtoi Casimir.
Fëmijët ishin nxënës në Shkollën Kamloops në Kolumbinë Britanike që u mbyll në 1978.
Kryeministri Justin Trudeau tha se ishte një “kujtim i dhimbshëm” i një “kapitulli të turpshëm të historisë së vendit tonë”.
Vendi po punon me specialistë të muzeut dhe mjekë për të përcaktuar shkaqet dhe kohën se kur kanë vdekur fëmijët.
Rosanne Casimir, shefja e komunitetit në qytetin Kamloops, tha se ky zbulim paraprak përfaqësonte një humbje të madhe që nuk u dokumentua kurrë nga administratorët e shkollës.
Shkollat rezidenciale të Kanadasë kishin të detyruar fjetjen dhe ishin të drejtuara nga qeveria dhe autoritetet fetare gjatë shekujve 19 dhe 20 me qëllim për të asimiluar me forcë rininë autoktone.
Shkolla rezidenciale indiane Kamloops është ndërtuar nga kisha katolike romake në 1890, shkolla kishte rreth 500 nxënës kur regjistrimi arriti kulmin në vitet 1950.
NDIQE LIVE "PANORAMA TV" © Panorama.al
