Po afrohet data kur kuqezinjtë do të zbresin në tapetin e blertë dhe tifozët interesohen për të pasur një biletë. Aq më tepër kur ndeshja e radhës është përballë Francës, një kombëtare me shumë lojtarë të njohur në arenën ndërkombëtare, përveçse një kombëtare me shumë histori.
Nga dita e djeshme, FSHF ka nxjerrë në shitje biletat për miqësoren e 13 qershorit që do të zhvillohet në “Elbasan Arena”. Kjo është një ndeshje e parashikuar në kalendarin e ndeshjeve të Grupit I, por shërben si një miqësore dhe jo si kualifikuese. Kjo, për vetë faktin se Franca është ekipi pritës i Europianit dhe pjesëmarrja në “Francë 2016” është e garantuar.
FSHF ka njoftuar në faqen e saj zyrtare se biletat kanë dalë në shitje në biletaritë pranë stadiumeve “Qemal Stafa” dhe “Elbasan Arena”, si dhe në adresën elektronike të institucionit të futbollit në vend. FSHF ka bërë me dije se biletat janë të pajisura me disa kritere sigurie. Disa prej tyre janë të dukshme me sy të lirë dhe disa të tjera, kontrollohen vetëm elektronikisht në pikat hyrëse të stadiumit “Elbasan Arena”.
Shqipëria është aktualisht në vendin e tretë në Grupin I, me pikë të barabarta me Danimarkën e vendit të dytë, por 3 golat e pësuar nga UEFA për rezultatin e dhënë në tavolinë në favor të Serbisë na rendisin pas danezëve.
SHQIPËRI – FRANCË
Sektorët Çmimet
Tribunat C2, G2 1.000 lekë
Tribunat C1, C3, G1 1.500 lekë
Tribunat D, F 2.000 lekë
Tribuna E 3.000 lekë
Tribunat B1, B5 6.000 lekë
Tribunat B2, B4, A1, A4 8.000 lekë
Tribuna A2, A3, B3 10.000 lekë
NDIQE LIVE "PANORAMA TV" © Panorama.al
