Një stacion në Vorë i krijuar vetëm për një ditë dhe një tren që priste pasagjerë aspak të zakonshëm për një udhëtim drejt Shkodrës. Vajza me fustane me thekë e flokë të harlisura, me dantella e pupla, e djem me kapele, shapka e tiranda. Asnjë zë që njofton se edhe për pak nisemi, pasi të gjithë kanë zënë vendet në vagona.
Kushtet në trenat që janë ende ata të kohës së komunizmit janë të pranueshme, ngase frekuentuesit e transportit hekurudhor janë gjithnjë e më të rrallë.
Vetëm 60 në ditë janë ata që zgjedhin këtë opsion ekonomik me linjën nga Durrësi në Shkodër. Pasagjerët e pazakontë duken si udhëtarë në kohë. Në tren asgjë nuk të thotë se jemi në 2016.
Katër orë kalojnë shpejt mes njerëzve që socializohen, shkëmbejnë biseda e vallëzojnë nën ritmet e muzikës xhaz që nuk ndalet. Yjet e Ditës Ndërkombëtare të Xhazit për festimet shqiptare, trioja e suingut nga Italia nën drejtimin e trombës së të mirënjohurit Michael Supnick, luajnë live.
Bota jashtë me stacionet e mjerueshme, gati fantazmagorike duket se nuk ekziston. Brenda, të gjithë flasin me gjuhën e suingut dhe të maratonës së organizuar nga “Hemingway fan club Albania”. Suing bëhet fjalë- kalimi nga vagoni në vagon dhe vetë treni është suing. Katër orët e para në tren ia lënë vendin pasdites me aromë shkodrane dhe xhiros me biçikleta në rrugicat me godinat karakteristike të arkitekturës së viteve ’20-’30 , ndërsa e gjithë pamja ngjall habinë e vendësve që pyesin ç’po ngjet.
Muzika suing transferohet në pedonalen e Shkodrës, e më pas në një tjetër koncert në teatrin “Migjeni”. Maratona mbyllet me një festë të madhe në tarracën e teatrit, ndërsa akrepat e orës tregojnë se 30 prilli, Dita Ndërkombëtare e Xhazit sapo është mbyllur për këtë vit.
NDIQE LIVE "PANORAMA TV" © Panorama.al