Gati një vit pas prezantimit si zëdhënëse e selisë së Partisë Demokratike, Oriela Nebiaj fotografohet nga paparaci duke pushuar në plazhin e Dhërmiut. E komentuar gjithnjë si figurë simpatike në botën e medias, kjo është hera e parë që Oriela fotografohet me bikini pas hyrjes në terrenin e ashpër politik. Ajo është shkëputur paksa nga jeta e zhurmshme e Tiranës, për të shijuar detin, rërën dhe diellin. Paparaci e ka fotografuar Nebiajn në momentin që po merrte rreze, pasi kishte dalë nga deti.
E veshur me bikini me ngjyra, përveç shtatëlartësisë që e karakterizon, Oriela na prezanton elegancën e saj dhe trupin e tonifikuar për t’u pasur zili. Sipas burimeve tona, deri tani fizikun në formë e ka mbajtur me ushqim dhe regjim të mirë. Mesa dimë nuk i ka frekuentuar asnjëherë palestrat, edhe pse i do shumë sportet, të cilat i ushtron kur ka kohë të lirë. Falë metabolizmit, mesa duket ka qenë e llastuar edhe nga gjenet, që i ka të trashëguara nga i ati.
Por natyrisht që rezultatet e trupit fibër ajo i ka edhe nga stili i jetës dhe mënyra si argëtohet me pushime, pasi është gjithmonë në lëvizje dhe asnjëherë ajo vajza që zgjedh të marrë vetëm rreze e shtrirë në shezlong. Në plazh Oriela bën shumë not, sporte uji, winsurf, ecje dhe vrap mëngjesi në breg të detit. Kohën e lirë, zëdhënësja e PD-së preferon ta kalojë duke lexuar libra, duke luajtur volejboll me shoqërinë e saj, apo dhe duke dëgjuar muzikë latine.
Përsa i përket karrierës, vajza simpatike e ekranit dikur, tani është përfshirë seriozisht në politikë, që është angazhimi parësor dhe i vetëm për të. Ajo është përqendruar plotësisht dhe me impenjimin maksimal për të qenë aty për çdo problematikë, ndërkohë që në shtator do të vijojë me jetën akademike.