UPDATE/ Pas lajmit të publikuar në media se në Surrel të Tiranës ekziston një rrugë me emrin ‘Edi Rama’, ka reaguar edhe Bashkia e Tiranës duke thënë se nuk ekziston një emërtim rruge me emrin e Kryeministrit.
“Duke u nisur nga një informacion që po qarkullon së fundmi në rrjetet sociale dhe i botuar në disa faqe online, Bashkia e Tiranës kërkon të sqarojë opinionin publik se në territorin e saj nuk ekziston asnjë rrugë, e cila të mbajë emrin “Edi Rama””,-thuhet në reagimin e Bashkisë së Tiranës.
Duke cituar ligjin, Bashkia thotë se emrat e rrugëve të qytetit vendosen ose ndryshojnë vetëm me vendim të Këshillit Bashkiak. “Bashkia e Tiranës bën me dije se në asnjë mbledhje të Këshillit Bashkiak të Tiranës apo të këshillave të ish komunave, të cilat tashmë janë pjesë e bashkisë së Tiranës, nuk ka shqyrtuar e as ka patur në plan ndonjëherë për të shqyrtuar një vendim të tillë”,-sqaron Bashkia, ndërsa shton se çdo informacion tjetër për këtë çështje është i rremë apo nga burime të pasakta e të pavërteta.
Ndërkaq, nëse kërkohet në internet, mjafton një klikim i thjeshtë në aplikacionet ‘Google Earth’ ose ‘Google Map’ për ta vërtetuar se ekziston një rrugë me emrin “Edi Rama”.
Rruga me emrin e kryeministrit Rama gjendet edhe në aplikacionin e hartës që Bashkia e Tiranës ka vendosur në faqen e saj.
Me shumë gjasa emërtimet e reja të rrugëve i dërgohen “Google” nga bashkitë e vendit që kanë të drejtën e emërtimeve dhe të ndryshimeve të emrave.
Por nëse Bashkia e Tiranës e mohon këtë, atëherë ngrihet pyetja se cili mund ta ketë bërë një dryshim të tillë, kur të drejtën ekskluzive për këtë e ka Bashkia vetë.
Më herët, lajmi u publikua në mediat online dhe më pas solli edhe reagimin e ish-kryeministri Sali Berisha.
“Mediat njoftojne se Rama i ka vene rruges ku banon ne Surrel emrin e tij. Po ju rikujtoj ketu se sarajet e tij ne Surrel jane simboli me i shemtuar i korrupsionit. Ne vitin 2011 ai deklaroi se kishte si kursime vetem 3 mije euro, nderkohe qe vetem pigmenti i betonit ka kushtuar 76 mije euro dhe ne hipoteke ka deklaruar se token truall te sarajeve e ka blere me 2$ metrin katror ne nje kohe kur aty toka shitej me 50$ metri katror. Tani prisni kur te shpalle rrugen prone personale”, shkruan Berisha.
NDIQE LIVE "PANORAMA TV" © Panorama.al
