Në këto kohë pandemie të Covid-19, kur më shumë se kurrë qytetarët kanë nevojë për fuqinë shëronjëse të artit, skulptorja nga Berati, Llambrini Dëna, me thjeshtësi e pa pritur ndonjë “porosi” nga lart, u ofron qytetarëve shqiptarë ekspozita virtuale të punimeve të saj.
Përmes veprave me zaje, ajo sjell marrëdhëniet njerëzore, “Paqen” në harmoninë e një familje, por edhe i fton njerëzit të reflektojnë për sjelljen e tyre e të qenit të përgjegjshëm e human ndaj tjetrit dhe natyrës.
“Është koha për ndërgjegjësim e reflektim ndaj vetes, shoqërisë e natyrës”, thotë ajo, ndërsa shpalos me delikatesë përmes zajeve një “Vorbull maskash njerëzore”, që bien e ngrihen në shoqëri, si në historinë e Sizifit.
Personazhe sarkastikë, si “Don Kishoti & Sanço Panço”, ajo ua ofron vizitorëve virtualë në “Facebook”-un e saj, duke u rrëmbyer një buzëqeshje dhe për të treguar se sa të kota janë “betejat me mullinjtë e erës”, përballë veprave që lënë gjurmë e sjelljeve humane.
Mjaft interesante janë edhe punimet në terakotë të artistes, ku motivet popullore vijnë të përshtatura në kohë edhe përmes një “Sfilate në Studio”. Portrete medituese, statura të brishta e ngjyra të ngrohta që të afrojnë butësisht me tradicionalen.
NDIQE LIVE "PANORAMA TV" © Panorama.al