Tre shqiptarë janë arrestuar nga policia italiane, nën akuzën e trafikut të drogës. Mediat fqinje shkruajnë se një sasi heroine është gjetur në makinën e tyre tip “Volkswagen Polo”, poshtë sediljeve të saj.
Arrestimi
Shqiptari me iniciale L.S., 31-vjeç, me banim në Robbiate drejtonte makinën. Policia e ndaloi atë në përgjatë unazës Lindore, në dalje të Usmate Velate.
Policia i kërkoi shqiptarit dokumentet e identifikimit, por ai tregoi shenja të dukshme nervozizmi.
Kjo nxiti dyshime te policia, e cila vendosi të ushtronte kontroll në makinë. Pas kontrollit karabinierët gjetën kështu 1.8 kilogramë heroinë të fshehura poshtë sediljes së pasagjerit, brenda një zgavre të bërë enkas.
Më pas policia e shtriu kontrollin edhe në shtëpinë e tij, ku u gjetën dy bashkëpunëtorët, po me shtetësi shqiptare, si dhe një sasi dogrash të tjera.
Falë qenit anti-drogë policia gjeti edhe në shtëpi 4.2 kg heroinë dhe rreth 300 gram marijuana.
Të arrestuarit e tjerë janë D.K., 31-vjeç dhe M.L., 36-vjeç, ky i fundit me banim në Sorisole, në provincën e Bergamo.
Po ashtu policia vendoi të kontrollonte edhe shtëpinë e shqiptarit në Bergamo, ku u gjet material për paketimin e dozave të drogës dhe 8 gram marihuanë.
Të tre shqiptarët e arrestuar janë në burgun e Monza, ndërsa droga, në total 6 kilogramë heroinë, e cila nëse do të hidhej në treg do të jepte më shumë se 250 mijë euro u sekuestrua.
