Kryeministri Edi Rama ka vendosur që pas një viti e gjysmë të rikthejë para oborrit të Këshillit të Ministrave, veprën e artit, ‘Kërpudhën’ e famshme, e cila u shkatërrua gjatë protestave të opozitës në muajin shkurt të 2019-ës.
Ditën e sotme janë parë punonjës të cilët kanë rivendosur veprën e artit “Kërpudhën gjigande me tri pjesë”. Kjo vepër arti kësaj herë është me e madhe se ajo që ishte herën e kaluar.
Këtë fakt, vetë kryeministri Rama e ka pohuar pasi vepra e parë u shemb dhe ai tha se do e ndërtojë të renë, por më të lartë.
Rreth një vit më parë, kryeministri Rama gjatë një forumi në Salzburg ka rrëfyer dhe bisedën telefonike që ka patur me autorin e kësaj vepre, Carsten Höller, ky i fundit i ka propozuar që ta ndërtojë 25 % më të lartë “Kërpudhën”.
“Para se të bëhesha kryeministër, gjithmonë thoja: “Nëse bëhem ndonjëherë kryeministër, kjo ndërtesa nuk do ketë gardhe”, sepse ishte e rrethuar, dukej si burg, me gardh me ushtarë. Gjithmonë kam besuar se ndërtesat mbrohen me anë të bukurisë, jo gardheve.
Hoqa gardhin dhe e hapa tërë katin e parë për popullin, e u bë ajo që sot është COD-i, kemi ekspozita, bibliotekë publike, një sallë të vogël kinemaje ku fëmijët mund të vijnë, të shohin filmat e tyre, të diskutojnë, zhvillojmë edhe diskutime aty.
Kam thënë që edhe protestuesit mund të vijnë ta përdorin atë pjesë falas, për të shtruar çështjen e tyre, e nëse duan, unë mund të shkoj, apo ministrat, për të folur me ta. Por protestuesit kanë një problem me diskutimin, sepse nëse debatojnë, nuk janë më protestues.
Nuk është e thjeshtë, por është aty edhe për këtë qëllim. Por kërpudha e Carsten Höller që ishte në kopsht nuk i mbijetoi sulmit të protestuesve, sepse e thyen.
E thyen dhe ishte e trishtë, por ishte edhe e vështirë t’i shpjegoje Carsten që nuk ishte një protestë estetike, ishte politike. Ishte kundër meje, jo kundër kërpudhës. Nuk më kapën dot mua dhe kapën kërpudhën. Kërpudha u thye.
Isha shumë i lumtur kur Carsten Höller më mori në telefon pas një muaji dhe më tha: “Kam një ide fantastike”. Sepse i thashë “duhet ta bëjmë prapë”.
“Do e bëjmë prapë, por duhet ta ngremë 25% më lart, që kushdo që e prek ta dijë se do kthehet më e lartë. Kjo do i pengojë njerëzit që ta prishin kërpudhën, por nëse ia dalin, kërpudha do rritet”.
DOMEDHËNIA E KËRPUDHËS
“Kërpudha Gjigante me Tri Pjesë”, e cila ishte e vendosur në kopshtin e Kryeministrisë ishte një vepër arti aga autori Carsten Höller.
Kërpudha Gjigante me Tri Pjesë ishte si një kolazh tridimensional i përbërë nga tri kërpudha më të vogla: njëra nga gjysmat është në formën e qeleposhes së kuqe (haluçinogjene), gjysma tjetër përbëhet secila nga një çerek kërpudhe boshe kortinarius orelanike (helmuese) dhe një koral në formën e havanit (kërpudhë që mund të hahet).
Kjo vepër i referohet mundësisë për ekzistencën e një kulture alternative ekzistuese apo të krijuar rishtazi, e cila arrin të përcjellë mundësi apo ndarje të pafundme./ Panorama.al
NDIQE LIVE "PANORAMA TV" © Panorama.al