Grupet e kërkim-shpëtimit Rumune, që morën pjesë në operacionin për nxjerrjen e trupave janë larguar sot nga Shqipëria.
Ambasada e Rumanisë në Tiranë në bashkëpunim me Kryetarin e Grupit Parlamentar të Partisë Socialiste, Taulant Balla organizuan sot një ceremoni në bazën ajrore në Rinas për përcjelljen e 52 forcave rumune të emergjencës.
Kreu i grupit parlamentar socialist, Taulant Balla në fjalën e tij falënderoi Rumaninë dhe forcat e saj për profesionalizimin dhe kontributin e dhënë në operacionet e kërkim-shpëtimin nën rrënojat e shkaktuara nga tërmeti.
Lëkundjet e forta të tërmetit, që goditën Shqipërinë mëngjesin e 26 nëntorit la pas 51 viktima, ndërsa qindra banesa janë shpallur të pabanueshme.
Shumë prej qytetarëve durrsakë janë akomoduar në hotele, tek të afërmit e tyre, madje disa janë ende nën çadra.
