Elmaze Xhaka, nëna e Granit dhe Taulantit, ka treguar mbështetje si për Shqipërinë dhe Zvicrën duke veshur një bluzë gjysmë për gjysmë në Lens.
Vëllezërit Xhaka janë rasti i parë në Evropë ku dy vëllezër ndeshen me njëri-tjetrin me kombëtare të ndryshme.
Granit Xhaka, i cili është blerë nga Arsenali për 35 milionë paund luan me Zvicrën vendin ku ka lindur dhe është rritur. Kurse vëllai i tij më i madh luan me Shqipërinë.
Nëna e tyre ishte ulur në shkallët e stadiumit krah të dashurës së Granitit, Leonita Lekaj, ku pranë tyre ishte dhe babai i vëllezërve.
Ragip Xhaka ka kaluar tre vite në burg si i burgosur politik në Kosovë. Ai doli 25 vjeç dhe nisi një jetë të re në Bazel.
Rriti dy futbollistë profesionistë, Taulant, 25 vjeç dhe Granit, 23 vjeç, të cilët nuk u kthyen më në Kosovë.
Para ndeshjes, në intervistat e tyre ata deklaruan se nuk janë vetëm vëllezër, por edhe miq.
Dueli i tyre nuk zgjati 90 minuta pasi De Biazi e zëvendësoi Taulantin në minutën e 62-të.
Kjo solli zemërim dhe reagimin e Xhakës, i cili përplasi bidonin e ujit në bankinë.
“Daily Mail”, shkruan se asnjë nga vëllezërit Xhaka nuk është “engjëll”, pasi Granit ka dalë tre herë me të kuq këtë sezon me Borussia Monchengladbach.
Taulanti është pezulluar dy herë te Bazeli pasi në një pasi qëlloi kundërshtarin në fushë dhe në një tjetër e shtyu atë.
Përballja e tyre u mbyll me rezultatin 1-0 për Zvicrën dhe Lorik Cana mori të kuq në minutën e 37-të.
