Flet kreu i FRESSH, Elisa Spiropali: “Vizioni i ri i për FRESSH, ide për zhvillim, jo karriera personale”

Sep 14, 2011 | 10:56
SHPËRNDAJE
Elisa Spiropali

Në një intervistë për gazetën “Panorama”, drejtuesja e Forumit Rinor Eurosocialist, Elisa Spiropali, mbi këtë përfaqësimin në këtë forum.
Ka vite që Forumi Rinor Eurosocialist nuk ka më shkëlqimin e dikurshëm, kur nxirrte deputetë, madje edhe kryeministra nga radhët e tij, të cilët, ç’është e vërteta, i ngjitën shkallët e karrierës duke kaluar të gjitha etapat partiake të konkurrimit. Përse mungon ky përfaqësim? Mungon ambicia politike e të rinjve për politikën, apo gjejnë mure të pakalueshme në PS?
FRESSH nuk punon për “shkëlqim”, por për produkt të matshëm. Këtë synojmë dhe këtë po bëjmë, forcimin e FRESSH në një strukturë të madhe rinore opozitare. Por, FRESSH nuk prodhon kryeministra siç prodhohen tullat në fabrikë. Jemi në tjetër kohë, të tjera rrethana, të tjera aspirata. Nëse ne të rinjtë do të synonim të gjithë të bëheshim ministra e kryeministra, të udhëhequr vetëm nga ambicia e pafre dhe jo nga talenti, e para pasojë e kësaj zgjedhjeje të mbrapshtë do të ishte tjetërsimi i Forumit dhe i politikës së majtë. Nuk ka pasur, nuk ka dhe nuk mund të ketë mur që të mund të ndalë as edhe një të ri të vetëm. Pra, nuk kemi mur. Kemi probleme kombëtare në marrëdhënie me të renë. Formën e organizimit për të forcuar mekanizmat e riciklimin e elitave, në politikë dhe kudo, për të forcuar, mundësuar formësimim e mendësive të reja. Për të penguar që Shqipëria të përmbytet nga të njëjtat muhabete kafenesh të të ngeshmëve “elitarë”, të cilët, politikën, median, biznesin, ligjin etj., etj., i bëjnë jo për shkak të talenteve të spikatura, por për shkak të lidhjeve të mbetura shpesh të kalbura. Sigurisht që kushtet kanë ndryshuar që nga koha kur për shkak të nevojës së madhe për distancim nga e kaluara diktatoriale, ishte imperativ përfaqësimi i të rinjve në nivelet më të larta. Por nuk ka ndryshuar fakti që ka nevojë për ndryshime të mëdha në mendësinë e politikëbërjes dhe pushtetmbajtjes. Ajo që lipset urgjentisht të përcillet te të rinjtë është besimi se politika nuk është një hapësirë ku përplasen interesa nga më të ndyrat, por ku përplasen ide të larta për zhvillim.
Çfarë po bën konkretisht FRESSH në këtë drejtim?
Në FRESSH kemi nisur punën për ta zgjeruar këtë hapësirë dhe ftojmë këdo që ndan këtë vizion për t’u bashkuar me ne. Ne kemi hartuar një program progresist të majtë, sepse besojmë që Shqipëria ka nevojë për ndryshim rrënjësor në marrëdhëniet e shtetit me pronën publike, krijimin e vendeve të punës përmes zhvillimit të brendshëm, besojmë te një arsim publik i fortë dhe serioz, sistem shëndetësor publik për të gjithë dhe, mbi të gjitha, besojmë se të gjithë, pavarësisht pozicionit të tyre shoqëror, duhet të kenë mundësi të barabarta, ligjore, ekonomike, politike. Gjithashtu, FRESSH po ngre në çdo shkollë, universitet dhe lagje, një rrjet të rinjsh që besojnë se kjo qeverisje, pa asnjë vizion dhe pa asnjë shpëtim, i ka tejkaluar me kohë ditët e veta dhe nuk mund të vazhdojë të jetë qeveria e shqiptarëve.
Mos në këtë situatë kanë ndikuar dhe eksperimentet e shumta të bëra në PS me Forumin Rinor, si dhe emërtime “Fabrika e ideve”, e më pas me vullnetarët apo patronazhistët, pa i strukturuar këto në një forum të institucionalizuar?
Është jetike për çdo parti të prodhojë mekanizma për të shtuar pjesëmarrjen dhe përfshirjen në axhendën e vet të një numri sa më të madh njerëzish. Këto organizma, që ju i quani
“eksperimente”, kanë pasur funksionet e tyre brenda PS-së dhe kanë dhënë rezultatet e tyre në kohë të caktuara për funksione të caktuara. Nuk shoh asgjë të keqe këtu. Por besoj që tani jemi në një fazë tjetër, ku nevojitet urgjentisht forcimi i FRESSH për të bërë atë që thashë më sipër, mundësimin e përfaqësimit të të rinjve në politikë, aspak në kuptimin e ngushtë dhe meskin si karrierë personale e njërit apo e tjetrit, por, mbi të gjitha, për të krijuar një mekanizëm që t’u mundësojë të rinjve progresistë shqiptarë përdorimin dhe, pse jo, shpërthimin e energjive të tyre në funksion të realizimit të kauzës së tyre. Kjo mund të bëhet vetëm përmes një strukture me rregulla të përcaktuara qartë, një strukturë meritokratike dhe konkurruese, me program dhe statut të qartë, si brendapërbrenda forumit, dhe në marrëdhënie me Partinë Socialiste.
Kur do të mblidhet kongresi i FRESSH dhe çfarë do të përcaktojë ai?
Vendimin për mbledhjen e kongresit të FRESSH e merr Kryesia dhe Asambleja Kombëtare e Partisë Socialiste. Urojmë, dhe po punojmë, që kjo datë të jetë sa më e afërt. Do të vlente kjo, dhe duhet domosdoshmërisht, për të bërë të mundur konsolidimin dhe konstituimin e Forumit tonë.

NDIQE LIVE "PANORAMA TV" © Panorama.al

Te lidhura