Në një mesazh në kuadër të Ditës së Rinisë, Presidenti i Republikës, Ilir Meta shkruan se mijëra të rinj po udhëheqin kauzën e solidaritetit për banorët e prekur nga tërmeti i 26 nëntorit.
Duke e konsideruar një fatkeqësi natyrore të pabesë që goditi vendin, kreu i Shtetit thekson se ata të rinj janë shembulli më konkret i Shqipërisë njerëzore për të cilën kemi nevojë më shumë se kurrë.
Reagimi i plotë i kreut të Shtetit:
Me mijëra të reja e të rinj shqiptarë, të organizuar vullnetarisht brenda e jashtë vendit që në momentet e para të tërmetit tragjik të 26 nëntorit, po udhëheqin kauzën e solidaritetit për banorët e prekur rëndë nga kjo fatkeqësi natyrore e pabesë që goditi vendin.
Përpjekjet e tyre të palodhura për mbledhjen e ndihmave materiale, fondeve dhe shërbimeve që po i ofrojnë komunitetit ditë-natë, janë sa emocionuese, po aq frymëzuese, dhe shembulli më konkret i Shqipërisë njerëzore për të cilën kemi nevojë më shumë se kurrë.
Ndaj sot me rastin e 8 Dhjetorit, Ditës së Rinisë, dua të falënderoj me mirënjohje të thellë, emër për emër, çdo vajzë e djalë, që shërben si vullnetar në shërbim të komunitetit.
Jeni të mrekullueshëm dhe të jashtëzakonshëm!
Ju inkurajoj dhe ju mbështes, që në shembullin e të rinjve dhe të rejave, të cilët 29 vite më parë vërshuan në rrugët e sheshet e Tiranës për ta ndarë Shqipërinë nga errësira dhe izolimi, të merrni në dorë, falë shpirtit të lirë, energjisë, guximit, kurajos dhe idealeve të pastra, fatet e atdheut tonë, duke udhëhequr proceset demokratike për ndërtimin e një të ardhmeje të sigurtë dhe europianizmit të plotë të Shqipërisë.
Nderim përjetë veprës së liderit të Lëvizjes Studentore, Azem Hajdarit dhe të gjithë studentëve të Dhjetorit ’90!
“E duam Shqipërinë si gjithë Evropa!”
Demokracia nuk negociohet, por vetëm mbrohet dhe me çdo çmim!
NDIQE LIVE "PANORAMA TV" © Panorama.al
