Emri i Fadil Berishës nuk ka nevojë për shumë komente për famën në Shtetet e Bashkuara, në Shqipëri dhe mbarë trevat shqipfolëse.
Përveç talentit në fotografi, ai përmendet shpesh edhe për promovimin e Shqipërisë në botë, por edhe artistëve shqiptarë. Këto ditë mbështetjen e tij në Nju Jork e ka marrë piktorja nga Tetova, Besa Dauti.
Është hera e parë që pikturat e saj, të cilat fokusohen te trëndafilat, ekspozohen në SHBA. Ekspozita “Besa’s Roses” (Trëndafilat e Besës), deri më 19 dhjetor qëndroi e hapur në “MC gallery” në Nju Jork, ku punët e saj u pëlqyen për stilin, teknikën dhe larminë e ngjyrave të harmonizuara bukur.
Më 20 dhjetor do të paraqiten në studion e Fadil Berishës, po në Nju Jork. Besa shprehet e emocionuar rreth ekspozitës: “Është një ngjarje e veçantë sepse jam përballë një artdashësi që i prezantohet për herë të parë arti im. Jam e privilegjuar dhe shumë e kënaqur me reagimin nga këto ditë që jemi këtu në ‘MC gallery’ … më 20 dhjetor do të jemi në studion e të mirënjohurit Fadil Berisha, të cilin gjej rastin ta falënderoj përzemërsisht”.
Mbështetje kanë dhënë edhe shqiptarë të tjerë të suksesshëm në Nju Jork, si Emina Cunmulaj, e cila bëri edhe një video-mesazh në galeri.
NDIQE LIVE "PANORAMA TV" © Panorama.al