Evis Mula: Një jetë boheme në ndjekje të profesionit

Nov 24, 2014 | 14:14
SHPËRNDAJE

Evis Mula në një nga rolet e saj operistike
Pas studimeve pranë “La Scalas”-s, në Milano, sopranoja Evis Mula rikthehet në Tiranë për rolin e Mimisë në operën “La Boheme”. Ajo çka ka të përbashkët me të brishtën Mimi, është të qenët “të qarta” në ato që duan. Bashkë me emocionin e debutimit, sopranoja e re duhet të mbajë dhe peshën e krahasimit me Nina dhe Inva Mulën

Atë skenë ajo e njeh që fëmijë. Qyshkur ëndërronte të vishte fustane me zhyponë, të vinte paruke krela-krela e t’i ngjante Ninës apo Invës… Sot ia ka arritur. Pas përfundimit të një kursi specializimi pranë “La Scalas”-s, në Milano, sopranoja Evis Mula rikthehet në Tiranë, në Teatrin Kombëtar të Operës dhe Baletit, për rolin e Mimisë në operën “La Boheme”. Ajo çka ka të përbashkët me të brishtën Mimi, është të qenët “të qarta” në ato që duan. Dhe Evis Mula, nga një derë artistësh e muzikantësh, e ka vendosur. Me një valixhe në dorë, si një bohem, ajo do të ndjekë profesionin e saj. Ndihet me fat për mbiemrin Mula, që ka nxjerrë aq emra të shquar, por në të njëjtën kohë dhe e emocionuar dhe me një barrë përgjegjësie mbi supe.

Ngjiteni në skenën e TKOB pas gjashtë vitesh mungesë, me rolin e Mimisë, si po e përjetoni rikthimin?
Jam e emocionuar, por e qetë dhe e lumtur që do të interpretoj në një opera që e dua shumë. Është një debutim për mua dhe ka shumë dashuri brenda. Për më tepër, ambienti që kam gjetur është shumë pozitiv. Po punojmë të gjithë me shumë energji, për të realizuar një opera sa më të freskët dhe që të depërtojë sa më shumë te publiku.
Një kthim përfundimtar në Shqipëri?
Nuk mund ta them përfundimisht. Jam e çelur për bashkëpunime dhe ne artistët shkojmë atje ku na kërkon profesioni. Është një jetë cigane, ashtu si është edhe titulli i operës. Është një jetë disi bohemiane, me një valixhe në dorë, me partiturat dhe telefonin të pandarë për të qenë në kontakt me miqtë, me të afërmit etj. Për momentin destinacioni është Shqipëria. Jam e hapur për bashkëpunime të tjera, për të marrë pjesë nëpër audicione. Kam në plan realizimin e një koncerti, por për momentin vëmendjen time të plotë e ka “La Boheme”.
Cilat janë eksperiencat tuaja të huaja?
Kam pasur eksperienca në disa skena të huaja. Kam kënduar në “La Scala”. Kam qenë në Pekin dhe në Japoni, në Parma, Reggio Emilia etj.
Ka një tjetër kulturë operistike në Lindjen e Largët?
Në Japoni është publiku i operës më i zjarrtë. Që kur zbret në  aeroport, të presin me pankarta. Kam pasur fatin të luaj te “Rigoletto” me legjendën e operistikes botërore, baritonin Leo Nucci dhe duartrokitjet kanë zgjatur për gjysmë ore.
Skeptikët janë në shtëpinë e operës?
Skeptikët dhe dashamirët. Por mendoj se skepticizmi e ndihmon mbarëvajtjen e një spektakli.
Keni pasur fatin të shkolloheni pranë “La Scala”-s, ç’dritare ju ka hapur kjo mundësi?
Të studiosh në “La Scala” nuk është një fjalë goje. Është një mundësi e jashtëzakonshme që të jepet, sidomos për një vajzë të re 21-vjeçare. Një nga shtytjet u bë “Maria Kraja”, konkursi ku u evidentova dhe ku nisi gjithçka. Të studiosh në “La Scala” do të thotë të marrësh gjithë përgatitjen e duhur për të ushtruar këtë profesion. Por puna nuk ka asnjëherë fund, është një proces për ne këngëtarët, që kërkon investim pa fund. Si në mjekësi…
Po ngjiteni në një skenë, ku kanë kënduar edhe emra të mëdhenj të operistikës shqiptare, me të cilët ju keni edhe lidhje gjaku, lidhje afektive, është kjo një përgjegjësi më shumë për ju?
Pa diskutim. Është tendenca për të bërë një krahasim me mbiemrin. Për mua të bësh të tilla krahasime, është një kompliment i madh. Mimi është interpretuar nga pedagogia ime Nina Mula, është interpretuar dhe vazhdon të interpretohet me mjeshtëri nga ikona e operistikes, Inva dhe ja ku vjen një ditë që dhe mua më jepet mundësia të luaj këtë rol, të cilin do ta realizoj, ashtu si unë di, me shumë dashuri, modesti dhe shpresoj të lë një përshtypje të mirë.
Mimi është një personazh kompleks, e brishtë, tragjike… ç’ka nga ju?
Mimi ka një metamorfozë shumë të fuqishme në vepër, ka ca kapërcime që për publikun ndoshta nuk janë shumë të kuptueshme, por që për këngëtarin duhet të jetë gjithçka e qartë, për ta realizuar atë. Mimi është një vajzë sa e brishtë, sa e tërhequr, e thjeshtë, aq edhe e qartë në gjërat që do dhe unë besoj se ky është emëruesi i përbashkët që kam me këtë personazh.
al.mi

NDIQE LIVE "PANORAMA TV" © Panorama.al

Te lidhura