Shtetasja italiane e cila u aksidentua gjatë ditës së sotme në aksin rrugor Pogradec-Lin, ka ndërruar jetë në spitalin e Traumës në Tiranë, ku u transportua me helikopter.
Gjithashtu mësohet se është arrestuar drejtuesi i mjetit tip “Benz” me të cilin u aksidentua 31-vjeçarja italiane, Elena Radaelli, e cila në momentin e ngjarjes ishte duke udhëtuar me një motomjet.
Sipas burimeve për Panorama TV, bëhet me dije se drejtuesi i “Benzit” që u përfshi në aksident, është shtetasi Artan Bali.
Ndërkohë materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
Reagimi i Policisë:
Pogradec-Vihet në pranga drejtuesi i automjetit, i përfshirë në aksidentin e ndodhur pasditen e sotme, si pasojë e të cilit ndërroi jetë drejtuesja e motomjetit.
Në vijim të informacionit paraprak të dhënë pasditen e sotme, për një aksident rrugor ju informojmë se specialistët e Trafikut Urban dhe Interurban të DVP Korçë, arrestuan në flagrancë shtetasin A. B., 33 vjeç, banues në Lushnjë, pasi në aksin rrugor “Pogradec-Lin”, pranë fshatit Udënisht, Pogradec, duke drejtuar automjetin tip “Benz”, është përplasur me një motomjet me drejtuese shtetasen italiane E. R., 31 vjeçe, banuese në Milano, Itali, e cila pas ndihmës mjekësore të marrë në spitalin e Korçës, u transportua në spitalin e Traumës Tiranë, ku ka ndërruar jetë.
Nga ana e Policisë po kryhen veprimet hetimore dhe po punohet për përcaktimin e shkaqeve të aksidentit.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë.
NDIQE LIVE "PANORAMA TV" © Panorama.al
