Presidenti i Republikës, Bujar Nishani, i ka dorëzuar dje titullin “Kalorës i Urdhrit të Skënderbeut” një prej emrave më të shquar të albanologjisë shqiptare, profesorit arbëresh Elio Miracco.
Një prej njerëzve dhe profesionistëve më të zellshëm e vullnetmirë të gjuhës dhe letërsisë shqipe në Fakultetin e Letrave dhe Filozofisë në Universitetin “La Sapienza” në Romë. “E gjithë jeta profesionale dhe prodhimtaria shkencore dhe akademike e deritanishme e profesor Miraccos ka qenë e lidhur pazgjidhshmërisht me identitetin, gjuhën dhe letërsinë arbëreshe e shqiptare”, u shpreh Presidenti i Republikës, i cili renditi disa prej pikave kulmore në veprimtarinë e profesorit arbëresh, në lëmë të letrave, por edhe në mbështetjen që i ka dhënë të rinjve të pasionuar pas letërsisë, duke i ndihmuar dhe nxitur në rrugën e vështirë studimore. Dhe jo rastësisht, në këtë ceremoni merrnin pjesë studiues, por edhe ish-studentë e bashkëpunëtorë të tij, si Persida Asllani, Dhurata Shehri, Mark Marku, Agron Gjekmarkaj, Ardian Marashi, etj.
Pas diplomimit në vitin 1967 në Universitetin “La Sapienza” të Romës, me temën e diplomës të udhëhequr nga Ernest Koliqi mbi “Historinë e traditën gojore në Shën Sofi” në lëndën e Gjuhës dhe Letërsisë Shqipe, Miracco nisi bashkëpunimin me Institutin e Studimeve Shqiptare në këtë Universitet të udhëhequr atë kohë po nga Ernest Koliqi, e më pas nga Giuseppe Gradilone, duke kontribuar në pasurimin e mëtejshëm të veprës monumentale të Institutit.
Hulumtimet e tij u përkasin degëve të ndryshme të albanologjisë, duke filluar nga çështjet filologjike e kritike me studimet e De Radës apo të Kadaresë e duke vijuar më tej me traditat gojore të arbëreshëve me materialet e mbledhura në shumë katunde të banuara nga kjo bashkësi në Itali, duke konsoliduar në këtë mënyrë filologjinë e bibliografisë tekstuale në albanologji.
“Kultura shqiptare ka qenë dhe është nyja e jetës së profesor Miraccos. Nuk mund të rri pa përmendur këtu qëndrimin e Institutit të Studimeve Shqiptare në ‘La Sapienza’ me në krye Ernest Koliqin, ku në momente dhe kontekste jo të lehta për historinë e kohës në Itali, ata nuk nguruan të denonconin shkeljet e lirive dhe të drejtave, si dhe krimet ndaj popullsisë shqiptare nga regjimi totalitar i Enver Hoxhës, duke e shndërruar atë Institut në qendrën e rezistencës antikomuniste shqiptare në Itali, në një institucion të lirisë kundër tiranisë.
Profesor Miracco ishte dhe është mediumi pasionant akademik, i cili nuk reshti së promovuari lidhjet e arbëreshëve me Shqipërinë, përkatësinë europiane të tyre”, vijoi Presidenti i Republikës, teksa shtoi se duke ndërthurur dijet me vetitë e rralla njerëzore tipike shqiptare, ia ka përkushtuar gjithë jetën e vet trashëgimisë kulturore arbëreshe, gjuhës shqipe dhe ndërkomunikimit kulturor mes Italisë dhe Shqipërisë, duke na zbukuruar hijshëm kurorën e krenarisë kombëtare edhe në anën tjetër të Detit Adriatik.
I pranishëm në këtë ceremoni, jo pa emocion, Miracco do të shprehte falënderimet e tij për këtë titull të lartë, ndërsa do të premtonte se do të vijonte punën e tij në lëmë të gjuhës dhe letërsisë shqipe e për të dhënë kontributin e tij në mbajtjen gjallë të kulturës arbëreshe në Itali.
NDIQE LIVE "PANORAMA TV" © Panorama.al
