UPDATE- Lënda plasëse që shpërtheu pak ditë më parë në postën e policisë së Fushë Krujës dyshohet se është hedhur nga një makinë tip Benz 190.
Ky fakt duket nga pamjet e kamerave të sigurisë të cilat prokuroria e Krimeve të Rënda i ka sekuestruar në një biznes privat që ndodhet pranë rajonit të policisë, pasi një nga kamerat e vëzhgimit ka pasur fushëpamje në zonën ku ka lëvizur mjeti i dyshuar.
Hetuesit kanë thënë se pamjet e kamerave nuk janë shumë cilësore, ndërkohe që edhe terreni ku ka lëvizur makina ka qenë në errësirë. Për këtë arsye, ka qenë e pamundur për hetuesit që të saktësojnë targat e mjetit nga i cili dyshohet se është hedhur bomba.
Hetimet për shpërthimin në stacionin policor të Fushë Krujës janë orientuar në pistën e një akti terrorist, ndërkohë që policia po vazhdon verifikimin e personave të dyshuar.
Patrulla të policisë janë porositur që të “krehin” zonën me qëllim verifikimin e gjithë automjeteve të ngjashme me atë nga i cili mendohet se është hedhur lënda plasëse.
Në një hark kohor të shkurtër në postën policore të Fushë Krujës janë regjistruar dy shpërthime me lëndë plasëse. I pari është regjistruar më 20 janar, ndërsa një tjetër në ditët e para të marsit.
NDIQE LIVE "PANORAMA TV" © Panorama.al
