Policia shkencore ka përfunduar ekzaminimin e kërkuar në lidhje me fletën e gjobës së Bashkisë Tiranë ndaj Partisë Demokratike për dëmet e shkaktuara gjatë protestës se 8 dhjetorit 2015.
Sipas përfundimit të arritur, fleta e gjobës ka nënshkrimin e Besmir Karajt, policit bashkiak, por plotësimi i saj nuk është bërë nga ky efektiv pasi shkrimi nuk është i tij.
Nuk dihet ende se kush e ka plotësuar gjobën në fjalë, ndërsa polici bashkiak Besmir Karaj ka theksuar se firma në fund të fletës është hedhur kohë më parë pasi është praktikë pune që fletët e bllokut të gjobave firmosen nga polici bashkiak dhe mbahen të firmosura ndërsa plotësimi i pjesës tjetër të fletës bëhet gjatë procesit të punës në vazhdimësi.
Pritet që në ditët e ardhshme prokuroria të thërrasë për të rimarrë në pyetje policin Besmir Karaj dhe punonjës të tjerë të Bashkisë për të sqaruar situatën.
Polici bashkiak ka pretenduar në kallëzimin e bërë në Prokurori më 10 dhjetor 2015 se më 8 dhjetor eprori i tij ia ka kërkuar bllokun e gjobave dhe më pas nuk di asgjë çfarë ka ndodhur derisa në media ka parë emrin e tij në fletën e gjobës së adresuar PD-së.
Vetë kryebashkiaku i Tiranës, Erjon Veliaj ka marrë përsipër vlefshmërinë e gjobës duke thënë se ajo nuk ka qenë e falsifikuar. Madje Veliaj deklaroi se nuk do të mbyllë mandatin në Bashki pa ia marrë gjobën PD-së.
NDIQE LIVE "PANORAMA TV" © Panorama.al