Tre gola në “Sami Ofer Stadium” dhe Shqipëria mori “hak” për turpërimin në “Elbasan Arena” më 11 qershor 2017. Fitorja e arritur në transfertë me dopietë të Armando Sadikut dhe gol të Ledian Memushajt, ishte e fundit për Xhani De Biazin në krye të kuqezinjve, duke e lënë Kombëtaren në vendin e tretë pas Spanjës dhe Italisë.
Po si është Kombëtarja nga Izraeli tek Izraeli? Çfarë ka ndryshuar, çfarë është bërë nën drejtimin e Panuçit, sa u përket fitoreve, barazimeve dhe humbjeve. Po golavarazhi? “Panorama Sport” sjell rezymenë e kuqezinjve në këtë periudhë dhe ekskluzivisht lajmin që në vendin tonë sot do të vijë arkitekti i atij triumfi në Izrael, trajneri me të cilin u përjetua ëndrra e madhe në “Francë 2016”, Xhani De Biazi.
ISH-TRAJNERI – Nuk do të ketë mundësinë që të futet në një nga sallat e resorit në Durrës ku po qëndron Kombëtarja dhe të nisë të ngrejë zërin për çdo gabim të shfaqur në fushë në miqësoret e fundit të Kombëtares. Me siguri që nuk do t’i dilnin disa ditë për këtë gjë, por as që të perfeksionojë ndonjë skemë speciale për të përsëritur triumfin në Izrael.
Gazeta ka mësuar se Xhani De Biazi do të jetë në vendin tonë për të ndjekur përballjen e radhës të Kombëtares dhe pse jo, për shumicën prej futbollisteve, raporti i të cilëve me ish-trajnerin vijon të jetë special, mund të shërbejë si autokritikë dhe frymëzim, duke rikujtuar momentet e arta të kualifikimit në evropian.
ECURIA – Nga largimi i De Biazit te ndeshja e fundit miqësore ndaj Ukrainës, Kristian Panuçi numëron tetë takime të drejtuara. Ndër to, bilanci nuk është brilant, duke qenë se ndeshjet e fundit miqësore u justifikuan si testuese dhe eksperimentuese për të parë si shkonin gjërat, edhe pse për hir të së vërtetës ndaj Ukrainës në fushë ishte një pjesëz e mirë e shtyllës së Kombëtares.
Ndër tetë ndeshjet, Panuçi ka shijuar shijen e triumfit vetëm me Lihtenshtejnin në debutim dhe në transfertë ndaj Turqisë. Barazimi i vetëm është ai në Maqedoni, me rezultatin 1-1 dhe më tej, humbjet janë pesë në total. Ndaj Spanjës e Italisë gjatë kualifikueseve dhe ndaj Norvegjisë, Kosovës dhe Ukrainës, si takime miqësore dhe që duhet të shërbenin për kolaudim. As golavarazhi nuk e përligj “Shqipërinë sulmuese”, pasi kemi shënuar vetëm shtatë dhe pësuar 15. Nga Izraeli tek Izraeli, Kombëtarja nuk shkon me statistikat e duhura, por duhet të shkojë me mendësinë e takimit të fituar në qershor 2017.
O.Tujani
NDIQE LIVE "PANORAMA TV" © Panorama.al
