AFRIM IMAJ/ I tronditur nga ato që mësoi në zyrën e Enver Hoxhës për çështjen e fejesës së pamenduar të djalit të Mehmet Shehut, Feçor Shehu doli në mesnatën e 21 shtatorit ‘81 nga zyra e kryeshefit, i bindur se kishte humbur shumëçka në besimin e këtij të fundit.
As më pak dhe as më shumë, kreu i regjimit e kishte shigjetuar fort dhe prerë ministrin e Brendshëm për tri faje të rënda: Së pari, që nuk ia ka thënë Mehmetit të heqë dorë nga krushqia me Turdiun si vajzë e një familjeje me të arratisur politikë. Së dyti, që nuk e ka vënë në dijeni atë kur ka marrë vesh celebrimin e lidhjes. Dhe së treti, që nuk ka dhënë asnjë informacion tek udhëheqja e Partisë kur Tirana ziente për këtë ngjarje të bujshme. Sakaq, Hoxha ka gjetur rastin dhe e ka fajësuar ministrin e Brendshëm se nuk i ka raportuar edhe për “paudhësitë” e djalit tjetër të Kryeministrit, Bashkimit, i cili, bashkë me të shoqen, shfaqen në Tiranë në shoqërinë e të huajve.
Përveç se kaq, Hoxha, gjatë bisedës, ka konsumuar të tjera informacione për “profilin e shthurur” të fëmijëve të Kryeministrit, të siguruara nga burimet e veta, që e kanë gjetur zbuluar kreun e Sigurimit, i cili e kishte detyrë parësore raportimin te shefi i tij për çështje të tilla që kishin të bënin me “pastërtinë” e figurës së lidershipit. Një fakt i tillë për Feçor Shehun nuk do të thoshte thjesht një tërheqje vëmendje, po shumë më tepër se kaq. Pas atyre çasteve kritike në zyrën më të rëndësishme të regjimit, ministri i Brendshëm, me të drejtë, e shihte veten në syrin e ciklonit. E, siç kishte mësuar nga përvoja, kjo nuk kishte të bënte thjesht e vetëm me sakrifikimin e karriges.
Prandaj, mendoi të thellohej në informacionet për ato që ceku Enveri në bisedë dhe të rikthehej tek ai, duke i ofruar një tablo më të plotë rreth tyre dhe njëherazi t’i binte dhe një herë në gjunjë për mungesat që i kishte lejuar vetes. Telefonoi në kabinetin e Hoxhës që të nesërmen për një takim të dytë, por Haxhi Kroi, eminenca e kreut të regjimit, sipas porosisë së këtij të fundit, i vuri në dukje se shefi e priste në zyrë në datën 24 shtator. Shehu, në ditën e caktuar, u paraqit te Hoxha duke u përpjekur t’i tregojë se kishte reflektuar thellë dhe këtë radhë kishte siguruar një informacion shumë më të bollshëm.
Por nga aq sa rezulton në dokument, ministri i Brendshëm, përveç ndonjë detaji të veçantë e të parëndësishëm për çështjen, nuk ofron diçka me interes për shefin e tij. I vetmi episod që Hoxha dëgjon për herë të parë, është vizita e aktorit të njohur Rikard Larja në shtëpinë e Mehmetit. Por si rrodhi takimi i 24 shtatorit ‘81 i Shehut me Hoxhën dhe çfarë ndodhi më tej me ministrin e Brendshëm….
DOKUMENTI
TAKIMI NË ZYRËN E SHOKUT ENVER HOXHA ME MINISTRIN E BRENDSHEM, FEÇOR SHEHU, MË 24.9.1981
Feçor Shehu kërkoi këtë takim për ta informuar Enverin për ndërhyrjen e bërë për lirimin pa të drejtë nga burgu të kunatit të Bashkim Shehut si dhe për takimet e palejueshme që bën ky dhe bashkëshortja e tij në lokalet publike me të huajt.
FEÇOR SHEHU: Kërkova sot këtë takim me ju, shoku Enver, për t’ju informuar mbi ngjarjen që ka ndodhur në Durrës sesi është liruar nga burgu vëllai i nuses se Bashkim Shehut. Në korrik të vitit 1979, vëllai i nuses së Bashkim Shehut ka shtyrë një polic që ishte me shërbim në plazh, për arsye se polici nuk e lejonte këtë për të luajtur me top në rërë. Atëherë, kunati i Bashkimit e ka shtyrë policin me mendjemadhësi. Për këtë arsye, dega e Durrësit e ka ndaluar për t’ia dhënë Gjykatës për gjykim, siç e ka në kompetencë. Pas kësaj ngjarjeje, Edmond Sanxhaktari, kushëri i Fiqrete Shehut, që është instruktor në KQ, ka ndërhyrë…
ENVER HOXHA: E di, e di, ky është kushëri i Fiqretit.
FEÇOR SHEHU: Edmondi, pra, shkoi në Durrës dhe i ka thënë kryetarit të degës së brendshme se me porosi të shoqes Fiqret, vëllai i nuses në Bashkimit të mos ndiqej penalisht, por të lirohej. Kjo është në kompetencën e Gjykatës, i ka thënë kryetari…
ENVER HOXHA: Mirë i qenka përgjigjur kryetari, drejt paska vepruar ai.
FEÇOR SHEHU: Atëherë, Edmondi i është drejtuar shokut Arianit Çela dhe siç më ka thënë kryetari i degës, ai ia mbushi mendjen atij, pastaj shkoi e i komunikoi kryetarit të degës së Durrësit, se dhe Arianiti ishte dakord me kërkesën për lirimin e kunatit të Bashkim Shehut. Rrjedhimisht, atë e liruan. Më e rënda pastaj, për mendimin tim, është se përveç ndërhyrjes, jashtë burgut ishte duke pritur makina-gaz e Grupit të shoqërimit të shokut Mehmet, që kishte brenda edhe të shoqen e Bashkimit. Bashkë me këtë kishte shkuar dhe një shoqërues. Dhe që të tre këta prisnin të merrnin të burgosurin. Oficeri i rojës së degës, i revoltuar me të drejtë, informoi kryetarin e degës, sepse u habit nga një veprim i tillë.
ENVER HOXHA: Në asnjë rast nuk na lejohet të mbyllim sytë ndaj të tilla dukurive.
FEÇOR SHEHU: Përveç të tjerave, gjatë punës sonë na doli se e shoqja e Bashkimit, në disa raste, ka shkuar në mënyrë të çrregullt në hotel “Adriatik” në Durrës, që frekuentohet nga të huajt. Ne bëjmë punën tonë dhe në asnjë rast nuk survejojmë të shoqen e Bashkimit.
ENVER HOXHA: Survejojeni dhe këtë se duhet.
FEÇOR SHEHU: Ne survejojmë francezin, shoku Enver.
ENVER HOXHA: Ju survejoni francezin, po duhet të shikoni se kush nga njerëzit tanë bisedon me të.
FEÇOR SHEHU: Gjatë këtyre rasteve është diktuar se e shoqja e Bashkimit nuk është takuar me të huaj, por ama ata e kanë parë në sy njeri-tjetrin. E shoqja e Bashkimit e shikon francezin dhe ky e shikon atë. Të bën përshtypje fakti se hedhja e syve në mënyrë të theksuar është diktuar edhe katër-pesë herë të tjera dhe jo vetëm në hotel, por edhe kur fëmijët e shokut Mehmet marrin motoskafin për të shëtitur në det. Edhe në këto raste, këta janë avitur atje ku qëndrojnë të huajt, sidomos njërin nga francezët që ne e kemi në përpunim që vete ditaditës në një vend të caktuar. Nusja e Bashkimit vete me fëmijët në këtë vend, po të huajt e shikojnë, bile të dyja palët kalojnë pranë njëri-tjetrit. Gruan e Bashkimit e kanë parë nja katër-pesë herë të sillet me të huajt në park.
ENVER HOXHA: D.m.th., dhe në park qenkan pjekur me njëri-tjetrin.
FEÇOR SHEHU: E shoqja e Bashkimit ka shkuar në park me fëmijët dhe shoferin dhe atje është ulur në një stol. Më vonë ka ardhur aty dhe francezi, i cili është ulur aty pranë në një stol tjetër. Pra, këto koincidenca nuk mund të mos lidhen me njëra-tjetrën. Në këto raste, punonjësit tanë druhen të informojnë. Unë mendoj që shokut Mehmet duhet thënë që ta mbledhë një çikë nusen e djalit, se po na ra në rrjetën e të huajve, do ta kemi zor të mos veprojmë kundër saj.
ENVER HOXHA: Mehmeti është shok i vjetër, po siç shihet ka dhe dobësira.
FEÇOR SHEHU: Më falni tani edhe për diçka tjetër. Kjo nusja e Bashkimit, Marjetë e quajnë, nuk vishet as në rregull. Vishet me fustan të çarë si ato të kinezëve. Bluzën ndonjëherë e lidhe me një kotkë që të bën përshtypje, aq sa edhe të huajt e shikojnë me vërejtje. Nga studimet që i kanë bërë njerëzit tanë dosjeve të disa të huajve, ata thonë se kjo vajzë është e bukur, liberale dhe shprehje të këtij lloji. Kjo sjellje e kësaj vajze të çon pastaj gjetkë. Kam dëgjuar të flitet që kjo vajzë ka probleme të tilla dhe nga familja, babai thonë që është…
ENVER HOXHA: Bëmë baba të të ngjaj, thotë populli
FEÇOR SHEHU: Mendoj që shoku Mehmet të kërkojë më shumë nga fëmijët e vet. Tani dua t’ju tregoj dhe diçka dhe nuk di si më këshilloni ju të veproj. Një ditë, duke biseduar me shokun Kadri Hazbiu, ai më tregoi se djali i tij ka vënë re që te Bashkimi në shtëpi shkon një farë Rikard Larja.
ENVER HOXHA: U, ai artisti?
FEÇOR SHEHU: Po, Rikardi është artist, po këtu gabojmë ne.
ENVER HOXHA: Bukur, artist është ai, po çfarë do në shtëpinë e Mehmetit?
FEÇOR SHEHU: Ky njeri e shfrytëzon këtë, duke folur andej-këndej se ka qenë në shtëpinë e shokut Mehmet Shehu, hëngra meze dhe piva me të etj. Mirëpo, punonjësit tanë nuk i njohin të tillë njerëz, pastaj ne kemi dhe një rregull, kur njëri prej tyre shoqërohet me fëmijët e udhëheqësve, ai nuk ndërhyn.
ENVER HOXHA: Ai nuk ka arsye të ndërhyjë, por ama duhet të të sinjalizojë ty mbi përbërjen e të tillë njerëzve.
FEÇOR SHEHU: Duhet t’u shqetësoj ndonjëherë për gjëra të tilla, por nuk kam se çfarë të bëj.
ENVER HOXHA: Jo, jo, mos më thuaj kështu. Këto çështje janë me rëndësi, se na krijojnë situata të rrezikshme. E shikon se si po ndodh me fejesën e Skënder Shehut?
FEÇOR SHEHU: Ja, pikërisht për këto i jam unë borxh Partisë. Pastaj, tek unë është edhe çështja e besimit qorrçe, sikur shoku Mehmet nuk gabon, dhe kam mësuar shumë nga kritika juaj e drejtë.
ENVER HOXHA: Mehmeti ka bërë një gabim të rëndë, por ti nuk duhet ta lejoje.
FEÇOR SHEHU: Megjithatë, e ndiej që kam boshllëqe në këtë çështje. Unë duhet t’i thosha troç shokut Mehmet: Nuk është për djalin tënd kjo vajzë. Pastaj, e dyta, kur pashë që kjo krushqi u bë, të vija te ju dhe t’ju raportoja.
ENVER HOXHA: Sikurse të thashë, tok me Nexhmijen, ne nuk dinim gjë fare. Këtë e mësuam nëpërmjet djalit, Ilirit. Ata e kishin ftuar që të shkonte të priste nusen, që do t’u shkonte për herë të parë në shtëpi. Kur po dilte Iliri, Nexhmija e pyeti: Ku po shkoni? Do të vete te shoku Mehmet,-u përgjigj ai,-më kanë ftuar se sot u vete nusja në shtëpi. -Cila nuse,-vazhdoi ajo.-U fejua Skënderi,-iu përgjigj Iliri. -Po me cilën,-e pyetën ne. Me vajzën e një profesori matematike, u përgjigj ai. U gëzuam natyrisht. Ne vendosëm të shkonim atë ditë e ta uronim edhe për shtëpinë e re, por u tërhoqëm dhe shkuam të nesërmen. Dolën na pritën Fiqreti, Mehmeti, nusja. Puthu e ngalasu me ta, dil në fotografi etj. Të pasnesërmen më treguan si qëndronte puna e biografisë së vajzës dhe u shqetësova shumë. Thirra menjëherë Mehmetin që kishte shkuar me shërbim në Korçë dhe bisedova për këtë çështje. Tani, ti Feçor, për të gjitha këto që më tregove, shko e thuaja Mehmetit. Vërja atij në dukje që për të mirën e Partisë e të tij, unë do të them disa gjëra që kam konstatuar dhe numëroja të gjitha këto që më tregove mua.
FEÇOR SHEHU: Skënderi u nda nga ajo vajza.
ENVER HOXHA: Fejesa e tij e di që mbaroi, po kemi hallin e djalit tjetër, Bashkimit, se mos na bëjë ky ndonjë punë me gruan e tij.
FEÇOR SHEHU: Se po e zbuluam ne që është spiune, pastaj do të jetë turp.
ENVER HOXHA: Do të jetë katastrofë. Si mund të lejojmë ne që një njeri i tillë të futet në shtëpinë e Mehmetit.
FEÇOR SHEHU: Mbase shokut Mehmet nuk do t’i vijë mirë, por…
ENVER HOXHA: T’i vërë fre kësaj gruaje, sepse sikurse më kanë ardhur të dhëna nga jashtë, ka probleme me moralin…
FEÇOR SHEHU: Diçka duhet të ketë.
ENVER HOXHA: Nejse, këto që bën ajo me të huajt, janë shumë të rënda, prandaj ti kështu vepro me Mehmetin, i thuaj që unë dëshiroj të të informoj për këto, kaq di dhe kaq po të tregoj.
FEÇOR SHEHU: Si urdhëron! Unë kështu si më porositët ju do të veproj.
ENVER HOXHA: Organet e Sigurimit që shikojnë gjithçka dhe i kanë sytë kudo, duhet të na informojnë edhe në drejtim të familjarëve tanë për çdo gjë që nuk është në normat e jetës sonë socialiste.
FEÇOR SHEHU: Ashtu është, shoku Enver. Ju faleminderit.
ENVER HOXHA: Me kaq mbaruam. Ditën e mirë.
Vijon
*Ky artikull është ekskluzivisht për Panorama. Riprodhimi i tij nga media të tjera në mënyrë të pjesshme ose të plotë pa lejen e kompanisë do të ndiqet në rrugë ligjore.
NDIQE LIVE "PANORAMA TV" © Panorama.al
