Tirana-Kukësi do të jetë sot edhe një duel gjigantësh. Majkëll Ngo (198 cm i gjatë) mbetet një pikë referimi për Tiranën, ndonëse ende nuk ka treguar më të mirën e tij këtë sezon dhe në 13 ndeshje ka shënuar vetëm 4 gola në kampionat. Nga ana tjetër, Kukësi i ka sytë nga Vasil Shkurtaj.
Vlonjati 190 cm i gjatë është i dyti në listën e golashënuesve të sezonit me 7 të tillë. Por, përveç kësaj, duket se Tirana është një nga pretë e tij të preferuara: në tri ndeshjet e fundit i ka shënuar 4 gola. Më 20 prill të këtij viti Kukësi mundi Tiranën në kryeqytet me rezultatin 0-3 dhe Shkurtaj bëri dopietë. Më 2 qershor të këtij viti, Kukësi mundi me rezultatin 2-1 Tiranën në finalen e Kupës dhe 27-vjeçari shënoi golin e parë.
Më 21 shtator, në javën e pestë të kampionatit, verilindorët mundën në “Elbasan Arena” Tiranën me rezultatin 2-1, ku Shkurtaj shënoi golin e dytë të Kukësit. E thënë thjesht, mbrojtja bardheblu është e paralajmëruar… Nga ana tjetër, Ngo nuk i ka shënuar asnjëherë Kukësit në kampionat, por e ka gjetur rrugën e rrjetës kundër verilindorëve vetëm në Kupë.
Bëhet fjalë për golin që shënoi në finale më 2 qershor të këtij viti, teksa barazoi shifrat në minutën e 64-t, pas golit të Shkurtajt në minutën e katërt. E megjithatë, në fund triumfoi Kukësi, pasi Rexhinaldo shënoi golin e fitores në minutën e 78-të.
SKANERI I MEMELLIT…
Pogradecari që fitoi për herë të fundit titullin me Tiranën bën një skaner të detajuar të dy lojtarëve, duke nxjerrë në pah avantazhet dhe mangësitë e dy tyre.
Avantazhet e Ngosë
“Majkëll Ngo është një lojtar shumë i fortë. Ai është vështirësisht i markueshëm kur e ka topin në këmbë. Për shkak të fizikut të tij, por edhe prej një teknike mbi mesataren për gjatësinë që ka, Ngo arrin ta mbrojë më mirë topin. Shërben mirë edhe nga thellësitë, pasi shpesh edhe tërhiqet. Ngo gjithashtu spostohet më me lehtësi nga krahët dhe shpeshherë ofron pasime të çmuara. Kjo e ndihmon skuadrën, sepse krijon hapësira dhe fiton terren”, deklaron Memelli.
Avantazhet e Shkurtajt
“Vasili e njeh më mirë portën. Nëse i krijohen hapësira, në 8 gjuajtje, 4 apo 5 i ka gol. Shkurtaj është më efikas edhe me kokë, pavarësisht se Ngo është më i gjatë (8 cm) se vlonjati. Pra, sulmuesi i Kukësit ka një koordinim më të mirë para portës, me këmbë dhe me kokë”, thotë Memelli.
OLSI AVDIJAJ
(LAJMIN E PLOTË E LEXONI NË VERSIONIN PRINT TË GAZETËS “PANORAMA SPORT”)
NDIQE LIVE "PANORAMA TV" © Panorama.al
