E PLOTË/ Rrëfehet arbitri i dhunuar: Kam hematoma në kokë, trajneri dha urdhër të më masakronin

Dec 11, 2017 | 22:48
SHPËRNDAJE

Alvi Paço ka përjet uar dhunën më të rëndë ndonjëherë në jetën e tij. I sulmuar nga më shumë se dhjetë lojtarë, pjesëtarë të stafit dhe tifozë të Këlcyrës, gjyqtari nga Fieri i ndeshjes së djeshme në Përmet, ishte njeriu për të cilin ndjenë të gjithë keqardhje. Edhe ata që panë videot e dhunës që ai përjetoi.

arbitri1-470x627

Një zgjatje dore duke akorduar penallti për skuadrën e Përmetit i kushtoi disa plagë në trup dhe kokë pas “lumit” të grushteve dhe shkelmave që ai morri në fushë. Në një intervistë për gazetën “Panorama Sport”, arbitri Paço rrëfen tmerrin që përjetoi në Përmet dhe se si ia mbajti të fshehtë prindërve për shumë orë duke mos i treguar asgjë. “Ishte një situatë skandaloze që nuk do ta harroj asnjëherë. Ishte trajneri i Këlcyrës, Robert Spahiu, që i nxiti lojtarët të më godisnin, ndërsa vetë më shante”, tha ndër të tjera Paço.

Si ndiheni pas asaj dhune që keni përjetuar?

Tani jam mirë. E kalova atë moment të vështirë falë Zotit dhe ndërhyrjes së forcave të rendit që ishin aty. Ishte një çmenduri, por tani jam mirë.

Çfarë pasojash ju kanë lënë goditjet?

Nuk pësova çarje, por mora goditje të shumta në kokë dhe në trup. Shkova në spital dhe bëra kontrolle, mora mjekim. Kam disa hematoma në kokë dhe shenja takash në trup, por nuk kishte asgjë të rrezikshme. Me atë që ndodhi, shpëtova shumë mirë.

Dhuna

Si ndodhi ngjarja dhe pse gjithë ai reagim i dhunshëm për një penallti?

Ishte minuta e 75-të dhe kishte goditje këndi për Përmetin. Pas harkimit në zonë ishte një moment që unë akordoj penallti për skuadrën vendëse. Në këtë moment protestojnë lojtarët e Këlcyrës dhe nisin të më shtyjnë. Brenda pak sekondash shoh që vërshuan lojtarë nga stoli, të cilët më goditën me grushte dhe shkelma. Më pas nisën të më dhunonin të gjithë. Ishte një situatë skandaloze që nuk do ta harroj asnjëherë. Ishte trajneri i Këlcyrës, Robert Spahiu, që i nxiti lojtarët të më godisnin, ndërsa vetë më shante.

Si u shpëtuat dhunuesve?

Ndërhynë forcat e rendit dhe situata u qetësua disi. Më pas shkova në spital dhe bëra edhe denoncim për tre futbollistët, Entiljon Kamberi, Andi Hina dhe Melej Xhakollari, të cilët u shoqëruan në komisariat.

E kishit menduar se mund të degjeneronte situata deri në atë pikë ku dihet që ky “derbi” është shumë i zjarrtë?

Jo, nuk e kisha menduar asnjëherë se do të shkonte situata deri në këtë pikë. Një ndeshje normale, por kurrsesi nuk ma merrte mendja se për akordimin e një penalltie do të dhunohesha në atë mënyrë.

Po familjarët si e përjetuan atë që ndodhi?

Nuk u kam treguar asgjë. Tani që po flasim jam rrugës duke u kthyer për në shtëpi, por nuk u kam thënë asgjë. Çfarë t’iu tregoj, t’i bëj merak kot. Kur të shkoj në shtëpi dhe të më shohin që jam mirë, do t’iu them se si kam shpëtuar.

BESAR BOZGO

NDIQE LIVE "PANORAMA TV" © Panorama.al

Te lidhura