Xhevdet Gela mund të jetë një opsion për Tiranën. Edhe pse nuk ka asgjë zyrtare, thuhet se menaxherët e lojtarit, nëse nuk mbyllin marrëveshjen me Skënderbeun, mund t’ia afrojnë (në mos e kanë bërë), Gelën ekipit bardheblu, i cili kërkon alternativa për mesfushën. Shqiptari me pasaportë finlandeze, Xhevdet Gela, është profili i futbollistit, që aq shumë kërkohet nga Tirana.
29-vjeçari luan si mesfushor qendre. Shtatlarti nga Kosova luan në Finlandë me skuadrën e Lahtit. Këtë sezon futbollistik është aktivizuar në 14 ndeshje, por nuk ka arritur të shënojë asnjë gol.
Në karrierën e tij si futbollist profesionist, Gela ka luajtur gjithmonë në kampionatin finlandez me përjashtim të një aventure të shkurtër në Poloni. Në total, në karrierën e tij ka shënuar 23 gola. Nga ana tjetër, Skënderbeu i ka ofruar 3 mijë euro rrogë, por lojtari nuk ka dhënë shenja aprovimi. Gjithsesi, ditët në vazhdim do të zbulojnë nëse Gela është në orbitën e Tiranës dhe mund të vishet bardheblu.
NDIQE LIVE "PANORAMA TV" © Panorama.al
