ETLEVA DELIA/ Përfshirja e ish-deputetit Arben Ndoka në aferën e falsifikimit të dokumenteve zyrtare për tjetërsimin e pronave në Lezhë, është zbuluar gjatë hetimeve që po kryheshin për grupin e Shijakut, pjesë e të cilit ishte edhe vëllai i tij, Gjevi Ndoka.
Gjatë përgjimeve të kryera në kuadër të hetimeve, Prokuroria ka transkriptuar edhe një bisedë për një truall 5 mijë metra katrorë, që ishte në pronësi të Ndokës. Burime nga Prokuroria thanë se Gjevi Ndoka, në periudhën pas vitit 2013, ka qenë pjesëtarë i stafit të Prefekturës Lezhë.
Si pjesë e kësaj administrate, dyshohet se ai ka krijuar lidhje me shumë zyrtarë lokalë, përfshirë ata të Hipotekës dhe ata të ALUIZNI-t e noterë. Vëllai i ish-deputetit Ndoka, sipas përgjimeve, rezulton se në bashkëpunim me persona të tjerë, duke falsifikuar dokumente përfitonte toka shtetërore, duke i kthyer në prona të tyre apo te persona të afërt.
Gjevi Ndoka nis operacionin e tij të tjetërsimit të pronave, duke kërkuar nga një person me profesion topograf foto dhe filmime të hartave të pronave në atë zonë për të kuptuar nëse kanë apo jo ndërhyrje apo pronarë.
PERGJIMET
Zona ku vepronte grupi i Gjevi Ndoka ishin pronat në Ishull Shëngjin, Ishull Lezhë, Mali i Shëngjinit dhe Mali i Rencit. Për herë të parë emri i ish-deputetit Arben Ndoka del pasi ai thirret nga Policia lokale për një sqarim në lidhje me një hetim, që po bëhej për tjetërsimin e pronave që, sipas dosjes, rezulton se janë përdorur edhe për ndërtime pallatesh.
Në praktikën nr.1018 të datës 13 korrik 2015, e sekuestruar nga Krimet e Rënda rezulton se Arben Ndoka, së bashku me vëllain e tij Gjevi dhe familjarë të tjerë, ndërhyjnë te zyrtarë lokalë, duke i korruptuar apo shantazhuar, duke përfituar toka kryesisht në bregdet. Gjatë përgjimeve, hetuesit kanë zbuluar një konflikt të nisur në familjen Ndoka për një pronë rreth 5 mijë m2 me pronar Arben Ndokën.
Kur ish-deputeti ka kryer verifikimet e tij, ka zbuluar se kjo pronë s’kishte kaluar në pronësi të tij, por në emër të dhëndrit, të Sandër Ndokës, vëllait të ndjerë të Ndokës.
E pikërisht ky veprim dyshohet se ka sjellë një konflikt ku ish-deputeti ka kërkuar që kjo tokë t’i hiqej dhëndrit të vëllait të tij e të rikthehej sërish në pronështet e më pas ai e dinte vetë si do vepronte për të fituar pronësinë.
Ndoka rezulton se u ka kërkuar shpjegime edhe zyrtarëve lokalë, si atyre në Hipotekë dhe pranë zyrës së pronave. Në një nga përgjimet e Prokurorisë rezulton se Arben Ndoka i drejtohet të vëllait të tij Gjevi me fjalët “E keni bo, e, o gabim i madh ky, e ka bo. O bo ky, se ju e keni bo, nuk e bona unë”.
AVOKATI
Avokati i ish-deputetit Arben Ndoka, Marash Ibraj, ka folur ditën e djeshme për mediat, ku ka thënë se akuzat ndaj klientit të tij nuk qëndrojnë, pasi ai nuk ka pasur asnjë funksion publik.
“Klienti im Arben Ndoka ka mësuar se akuzohet për falsifikim. Ai nuk ka pasur asnjë post funksionari, që të mund të falsifikonte firma, ai ka qenë thjesht përfaqësues i popullit. Nuk ka lëshuar asnjë akt. Si mund të akuzohet për këtë gjë? Klienti im e kundërshton kategorikisht çdo akuzë”, tha Ibraj.
Nga ana tjetër, Policia tha zyrtarisht se hetimi disamujor ka mbledhur prova edhe se ky grup kriminal dyshohet si i implikuar në abuzimet me troje shtetërore në zonën e Lezhës dhe Kurbinit, përmes falsifikimit të dokumenteve, vulave etj..
PANORAMA
NDIQE LIVE "PANORAMA TV" © Panorama.al
