Anatoli Timoshçuk është një nga legjendat e futbollit në Ukrainë dhe në dekadat e fundit, sukseset e tij krahasoheshin vetëm me ato të Andri Shevçenkos. Por nga legjendë, ai tashmë është kthyer në një emër të urryer në vendlindjen e tij.
Ish-futbollisti i cili në karrierën e tij fitoi edhe Ligën e Kampioneve me Bajern Mynih ne vitin 2013, rekordmen në përfaqësuese me 144 ndeshje të luajtura, ka vendosur që të mos largohet nga Zenit Shën Petersburg, klub ku ai mban rolin e zëvendëstrajnerit. Diçka e papranueshme në Ukrainë, pas pushtimit të Rusisë dhe qëndrimit të qartë që e gjithë bota po mban ndaj saj.
Kështu, Komiteti i Etikës në Federatën Ukrainase të Futbollit, ka lëshuar një paralajmërim të qartë ndaj ish-futbollistit për rolin që tashmë cilësohet negativ në situatën e krijuar, pasi jo vetëm vazhdon punën te Zenit, por edhe nuk ka folur publikisht kundër pushtimit rus.
Kështu, janë propozuar një sërë masash ndaj ish-futbollistit nëse nuk ndryshon menjëherë qëndrim:
- Heqja e licencës si trajner profesionist.
- Heqja e të gjithë titujve shtetërorë dhe titujve honorifik.
- Heqja e statusit të fituesit të trofeve kombëtarë me klube në Ukrainë.
- Heqja e Timoshçuk nga libri zyrtar i lojtarëve që kanë përfaqësuar ekipet kombëtare të Ukrainës.
PANORAMASPORT.AL
NDIQE LIVE "PANORAMA TV" © Panorama.al