Dy persona të armatosur kanë tentuar të grabisin një banesë në Selenicë të Vlorës. Ngjarja ka ndodhur mbrëmjen e djeshme (25 tetor), ndërsa policia thotë se ka identifikuar njërin prej autorëve.
Grabitja ka dështuar, pasi autorët janë diktuar nga të zotët e shtëpisë dhe janë larguar me një makinë.
Policia u vu në ndjekje të tyre, ndërsa thotë se pasi kanë braktisur makinën kanë përfituar nga errësira dhe janë larguar.
“Më datë 25.10.2020, rreth orës 20:00, në fshatin Haderaj, Selenic, dy persona kanë tentuar të vjedhin me armë në banesën e shtetasit F.Ç, por nuk kanë mundur, pasi janë diktuar nga të zotët e banesës dhe janë larguar me një automjet Benz.
Shërbimet e Policisë me marrjen e njoftimit kanë shkuar menjëherë në vendngjarje.
Shërbimet e Policisë janë vënë nē ndjekje të autorëve të cilët kanë braktisur mjetin dhe duke përfituar nga errësira janë larguar ku vijon krehja e zonës për kapjen e tyre”, thuhet në njoftimin e policisë.
Grupi hetimor, nën drejtimin e Prokurorisë, po vijon veprimet për zbardhjen e rrethanave të ngjarjes dhe identifikimin e autorit të dytë.
NDIQE LIVE "PANORAMA TV" © Panorama.al
