Mëngjesin e sotëm derisa po nisej për punë, persona ende të panjohur kanë goditur me shufra metalike në kokë drejtorin e burgjeve të Kosovës Sokol Zogajn.
Si pasojë, ai ka pësuar lëndime në kokë.
Sipas mjekëve gjendja e tij është stabile dhe jashtë rrezikut për jetë.
Shpend Fazliu zëdhënës i QKUK-së ka thënë se Zogaj mëngjesin e sotëm ka kërkuar ndihmën e mjekëve pas lëndimeve që ka marrë.
“Mund ta konfirmoj se ai ka kërkuar ndihmë pas plagëve të marra në kokë. Është jashtë rrezikut për jetë dhe gjendja e tij aktuale është stabile”, ka thënë Fazliu për Express.
Sipas tij tash mbetet që pacientit t’i bëhen ekzaminime shtesë për të parë nëse ka lëndime më të thella.
Ky rast është konfirmuar nga Ministria e Drejtësisë.
“Sot, rreth orës 07:00 të mëngjesit duke dalë nga banesa e tij në Prishtinë, nga persona deri më tash të panjohur është sulmuar brutalisht Ushtruesi i Detyrës së Drejtorit të Përgjithshëm të Shërbimit Korrektues të Kosovës, z. Sokol Zogaj”, thuhet në njoftimin e Ministrisë e cila e ka dënuar ashpër sulmin brutal ndaj z. Zogaj, dhe i ka ftuar organet kompetente ta trajtojnë rastin, në mënyrë që kryerësit e këtij akti brutal të dalin para organeve të drejtësisë.
“Ministria e Drejtësisë do të bashkëpunoj me organet kompetente deri në zbardhjen e plotë të sulmit brutal ndaj z. Zogaj.
Si ndodhi ngjarja
Insajderi ka mësuar se dy persona të maskuar fillimisht kanë provuar me dhunë ta marrin Ushtruesin e detyrës së Drejtorit të Shërbimit Korrektues, Sokol Zogaj, dhe ta çojnë në bodrum të banesës në lagjen Ulpiana.
Mirëpo, kur e kanë dërguar poshtë, dera e bodrumit ka qenë e mbyllur. Pas kësaj situate këta dy persona e kanë sulmuar me shufra metalike dhe mjete tjera të forta.
Mjeket kanë treguar se gjendja e tij është stabile, nuk ka thyerje, ndërkohë pritet t’i bëhet një incizim i thellë në kokë për të parë gjendjen e tij.
Zogajt i janë qepur plagët në kokë të shkaktuara nga kjo rrahje.
Për më tepër, Insajderi më herët ka raportuar për rrahjen e Sokol Zogajt në hyrje të banesës së tij.
Lidhur me rastin ka reaguar edhe Ministria e Drejtësisë, duke kërkuar hetim për sulmin brutal nga Ushtruesit të detyrës së Drejtorit të Shërbimit Korrektues të Kosovës.