Deputeti i përjashtuar nga PS-ja, Tom Doshi është i vendosur t’i shkojë deri në fund çështjes gjyqësore me deputetin e LSI-së, Spartak Braho.
Nga seanca e sotme gjyqësore në Gjykatën e Lartë, me kërkesën për shfuqizimin e vendimit të parë, që nuk gjeti elementë të veprës penale në letrën e Brahos, Doshi ka përsëritur akuzën se Braho ka vrarë ushtarë në ’90-n dhe nuk meriton të jetë në Kuvend.
“Ai person ka ekzekutuar me dorën e vet ushtarë para vitit 90-të dhe nuk e meriton të jetë në parlament”- ka thënë Doshi.
Sa për procesin në fjalë, avokatët e Doshit theksuan se prokuroria nuk ka bërë veprimet e nevojshme hetimore, ndërkohë që prokurori e kundërshtoi këtë fakt.
Gjykata vendosi të shprehet me vendim më datën 16 shkurt.
Prokuroria në krah të Brahos: Nuk shpifi ndaj Tom Doshit
Prokuroria e Përgjithshme i ka kërkuar sot Gjykatës së Lartë që të shpallë të pafajshëm Spartak Brahon për akuzën e shpifjes, të cilën e pretendon Tom Doshi.
Bëhet fjalë për një deklaratë të kryetarit të komisionit të Sigurisë Kombëtare sipas të cilit Tom Doshi kishte falsifikuar një raport mjekësor për të mos marrë pjesë në mbledhjen e Komisionit të Mandateve kur shqyrtohej mandati i tij për akuzat ndaj Ilir Metës.
Sipas Brahos, Doshi kishte përfituar nga fakti që gruaja e mjekut që kishte dhënë raportin punonte te Profarma.
Në mbledhjen e sotme prokurori i çështjes u shpreh se deklarata e Brahos është vetëm një opinion i tij dhe nuk ka elementë të veprës penale.
Gjykata e Lartë deklaroi se do të japë në 9 shkurt vendimin për këtë çështje.
Tom Doshi ka kërkuar 1 lekë dëmshpërblim për akuzat e Spartak Brahos.
NDIQE LIVE "PANORAMA TV" © Panorama.al