Anëtari i Komisionit të Vlerësimit në Partinë Demokratike, Besnik Mustafaj, në një deklaratë për mediat u shpreh se komisioni ku bën pjesë, është i angazhuar për të zgjedhur më të mirët për PD-në.
Mustafaj theksoi se nga baza janë propozuar emra konkretë, që janë kandidatura serioze.
Më tej, ish-ministri i Jashtëm tha se shpresonte që të dilte i paturpëruar nga ky proces, pasi sipas tij ishte puna më e komplikuar që kishte marrë ndonjëherë përsipër.
“Nuk jam zëdhënësi i Komisionit, por mund të them përshtypjet e mia personale të cilat janë shumë optimiste. Është një proces i ri, i panjohur në historinë politike të Shqipërisë së këtyre 30 viteve.
Unë konstatova se ka një prurje jashtëzakonisht të pasur, çka tregon se propozimet e demokratëve në të gjithë Shqipërinë kanë qenë serioze.
Ne jemi seriozisht të angazhuar për të zgjedhur vlerat më të mira të këtij kontigjenti që përbëjnë burime njerëzore të mëdha, jo vetëm për Partinë Demokratike, por edhe për Shqipërinë.
Gjërat janë në vazhdim, unë shpresoj që, në fund të këtij procesi, të dal i paturpëruar, sepse është detyra më e vështirë, më delikate dhe më komplekse që kam marrë ndonjëherë përsipër.”, tha Mustafaj.
