Një ngjarje e tmerrshme u raportua nga mediat italiane të dielën, duke lajmëruar vdekjen e një foshnje shqiptare vetëm 1 vjeç e cila u sulmua nga dy qen pitbull. Ngjarja ndodhi pasditen e djeshme në komunën e Flero, në Breshia të Italisë.
Sipas mediave italiane, vogëlushja jetonte me nënën e saj tek gjyshërit, pasi babai, shqiptar, ishte në Gjermani për të kërkuar punë, pasi e kishte humbur punën në Itali.
“Tgcom” shkruan se në momentin kur ndodhi ngjarja, 1-vjeçarja ishte në shtëpi bashkë me gjyshen dhe gjyshin, pasi nëna 22-vjeçare (italiane) ndodhej në punë.
Pasi doli në oborrin e shtëpisë për të luajtur, ajo u sulmua egërsisht nga dy qentë e gjyshit të saj.
Pavarësisht se ky i fundit ndërhyri për ta shpëtuar, nuk arriti të shpëtonte vogëlushen.
Mësohet se vajza mori lëndime të mëdha në kokë, të cilat i shkaktuan vdekjen e menjëhershme.
Sakaq, edhe gjyshi ndodhet i shtruar në spital me demtime, por jashtë rrezikut për jetën. Mediat italiane raportojnë mes të tjerash se nëna e vogëlushes për shkak të shokut të madh që përjetoi pas lajmit të tmerrshëm, është shtruar në spital.
