Bashkë me drejtorin e Burgut “313” Eduard Struga, janë vënë në pranga edhe dy persona të tjerë. “Panorama” mëson se Prokuroria e Posaçme kundër Korrupsionit dhe Krimit të Organizuar ka ngritur akuzën e korrupsionit pasiv të personave që ushtrojnë funksione publike ndaj kreut të IEVP-së.
Në njoftimin e SPAK, të siguruar nga “Panorama”, thuhet se “pas regjistrimit të procedimit penal, strukturat e Policisë Gjyqësore të Drejtorisë së Përgjithshme të Policisë së Shtetit kanë arrestuar në flagrancë shtetasin E.S, me detyrë drejtor i burgut ‘Jorgan Misja’, shtetasin F.A, me detyrë Shef i Logjistikës i IEVP-së ‘Jordan Misja’ dhe shtetasin E.K, përfaqësues i një subjekti tregtar. Shtetasit F.A. iu sekuestrua në cilësinë e provës materiale shuma prej 100 mijë lekësh, objekt i përfitimit të parregullt”.
Gjithashtu, SPAK thekson se:
“Funksionarët publikë të arrestuar në flagrancë në mënyrë të përsëritur kanë kërkuar dhe marrë shuma të konsiderueshme parash (rreth 550 mijë lekë) si përfitim i parregullt, në këmbim të krijimit të favoreve për të ushtruar aktivitet tregtar në ambientet e brendshme të IEVP-së ‘Jordan Misja’ në Tiranë”.
“Shtetasi E.K., i arrestuar në flagrancë, u ka dhënë funksionarëve publikë, si përfitim të parregullt, shuma të konsiderueshme parash”, thuhet më tej.
Hetimet nisën pas denoncimit të një shtetasi dhe po vijojnë ende.
NDIQE LIVE "PANORAMA TV" © Panorama.al