Ish-ministri i Jashtëm i Shqipërisë, Besnik Mustafaj, ka analizuar situatën politike, por edhe përpjekjet që po bën sot qeveria për përballimin e situatës pas tërmetit të 26 nëntorit.
Ai pohoi në rubrikën “Opinion” në ‘News24’ se kryeministri Edi Rama po përdorë qartë gjuhën populiste kur thotë se të plagosurit e tërmetit shkatërrimtar do të trajtohen me pension të përjetshme. Më tej Mustafaj tha se edhe pse është pro solidaritetit njerëzor, këtë premtim të Ramës nuk e sheh të realizueshëm.
“Gjërat nuk kanë nevojë për vlerësim. Ka një mobilizim për zgjidhjen e problemit, pra me zgjidhjen e përkohshme të banorëve. Jemi në prag të dimrit dhe koha po ftohet. Gjendjen e jashtëzakonshme, Rama po e përdor për të mbyllur median, a thua se shtypi është përgjegjës për pasojat e tërmetit. Deklarimet e tij janë populiste. Pension të përjetshëm i jepet atij që është plagosur në shërbim të atdheut. Ku do t’i marrë kryeministri këto para. Unë jam për t’i ndihmuar, sepse solidariteti është tipar i shoqërisë demokratike. Solidariteti ka të bëjë me riparimet dhe rregullimet imediate.
Kryeministri po e menaxhon keq situatën, kundër interesit të përbashkët dhe nuk ka të bëjë më konceptin e solidaritetit. Tani të kultivojë një gjuhë realizmi. Të mos angazhojë shtetin në përgjegjësi që nuk i ka, e kam fjalën këtu për pensionet e përjetshme, por nuk mund ta angazhojë shtetin. Ky pension i jepet një polici. Mobilizim nuk ka qenë preventiv, strukturat nuk ishin të përgatitura. Nuk kishin logjistikë dhe të përgatitur profesionalisht. Nuk kanë fuqinë e nevojshme njerëzore, u desh të vinte qeni “heroi” i Kosovës, i cili ndihmoi në shpëtimin e disa jetëve. Reagimi nuk ka qenë preventiv. Reagimi reaktiv ka qenë maksimal, sepse përballë tragjedisë askush nuk do të rrinte me duar në xhepa”-tha Mustafaj.
I pyetur për ftesën që Rama i dërgoi opozitës për t’u ulur së bashku në tryezën e Komitetit Kombëtar të Rindërtimi, Mustafaj u shpreh se opozita duhet të merrte pjesë për të treguar se është në krahë të njerëzve”- shtoi ai.
Gjithashtu ai komentoi pezullimin e Arben Malajt nga Banka e Shqipërisë, ndërsa tha se kritikat e tij janë të dobishme për politikat fiskale në vend.
“Malaj ka disa kohë, shumë kohë që vjen në kritika në rritje ndaj politikës financiare. Realisht kjo prania në këtë bord, ka qenë një pengesë, qoftë edhe e pjesshme, brenda tij si profesionist janë akoma më të ashpra mbi abuzimet me pushtetin dhe kontrollin politik që ka Edi Rama mbi bankën qendrore. Unë besoj se atë që thotë Malaj do ta mbajë. Kritikat e tij do të jenë më të ashpra dhe të dobishme për vendin”- tha ndër të tjera Mustafaj.
NDIQE LIVE "PANORAMA TV" © Panorama.al
