Kryetari i Partisë Demokratike Lulzim Basha ka drekuar me ambasadorin e Shteteve të Bashkuara në Tiranë, Donald Lu në një lokal në zonën e ish-Bllokut sot në Tiranë.
Ende nuk ka detaje në lidhje me bisedën e tyre. Ishte ora 14:05 kur nga lokali u largua lideri i opozitës Basha pa folur asnjë fjalë për mediat.
Lideri opozitar pak më herët mbajti fjalimin e tij të parë në parlament dhe më pas ishte i pranishëm në homazhet e zhvilluara në nder të Azem Hajdarit, për 19-vjetorin e vdekjes së tij.
Kreu i Partisë Demokratike, Lulzim Basha, nga foltorja e Kuvendit u shpreh se marrëveshja e tij me Ramën e arritur më 18 maj, përfundoi me zgjedhjet e 25 qershorit. Teksa u shpreh se “thelbi i marrëveshjes së 18 majit ishin zgjedhjet e lira dhe të ndershme”, Basha tha se “Ndaj dhe zgjedhjet e 25 qershorit shënuan edhe vdekjen e kësaj marrëveshjeje”.
Ai tha se marrëveshjen e vranë shitblerja e votës dhe aleanca e Ramës me krimin.
“Aleanca e pandërprerë e Ramës me krimin dhe shitblerja e votave me paratë e drogës dhe të korrupsionit e vranë marrëveshjen. Zgjedhjet rikonfirmuan problemin numër 1 të Shqipërisë: vjedhjen dhe tjetërsimin e vullnetit të Shqiptarëve për hir të pushtetit personal dhe privat të Edi Ramës”, tha Basha.
