Kryetari i Partisë Republikane, Fatmir Mediu ka reaguar për situatën brenda Partisë Demokratike, ku sipas tij vlera e kësaj force politike qëndron tek ata që kanë themeluar PD qoftë në nivel qendror, qoftë në atë lokal.
I pyetur nga gazetarët, Mediu u shpreh se aleanca e PR me PD është e hershme duke theksuar se kriza brenda Partisë Demokratike duhet të zgjidhet sa më parë.
Sipas tij ka rrugë për të gjetur mirëkuptim dhe për ta bërë më të fortë PD-në.
“Aleanca me PR dhe PD është e hershme dhe shpresoj që PD të dalë nga kjo krizë. Vlera e PD qëndron në ata që kanë themeluar PD, që kanë pjesë në nivel lokal e qendror, dhe padyshim të jetë e hapur për një sinergji të re me njerëz të rinj në PD. PD është vlerë e shoqërisë shqiptare dhe në këtë pikëpamje duhet të përcaktohet qëllimi dhe zgjidhja e këtij qëllimi. Ka rrugë për të gjetur mirëkuptim për ta bërë më të fortë PD dhe për ti dhënë një raport më ndryshe edhe opozitës nën lidhershipin e PD”, tha Mediu.
Kujtojmë që Partia Demokratike është futur në një debat të brendshëm që prej përjashtimit nga grupi parlamentar i Sali Berishës, i cili u shpall non grata nga ShBA-të.
Pas vendimit të Bashës, Sali Berisha nisi turin e takimeve me demokratët dhe vetëm pak ditë më parë dorëzoi firmat me qëllim mbledhjen e Kuvendit Kombëtar, që si datë Sali Berisha shpalli 11 dhjetorin.
Ndërkohë strukturat drejtuese të PD thonë se kërkesa e Berishës për mbledhjen e Kuvendit nuk është e drejtë dhe sipas tyre firmat nuk janë të verifikuara.
NDIQE LIVE "PANORAMA TV" © Panorama.al
