Daja: Kupa më duhet mua por edhe qytetit të Korçës, Shehin nuk e lëmë të bashkohet me stafin sepse…

Apr 18, 2018 | 21:04
SHPËRNDAJE

Trajneri i Skënderbeut, Ilir Daja, deklaroi pas ndeshjes me Flamurtarin, ku arriti edhe finalen e Kupës së Shqipërisë, se tashmë kërkon edhe këtë trofe në Korçë, por dha edhe një koment për Shehin si një trajner i mundshëm në të ardhmen.

Daja

Ishte një përgjigje për cilësinë e skuadrës suaj?

Padiskutim, ishte një reagim. Filloi që në kampionat ndeshjen e fundit. Jemi kualifikuar sepse e kemi vlerësuar maksimalisht Flamurtarin. Pas rezultatit pozitiv që bëri në Korçë, pasi ne nuk kishim humbur asnjë ndeshjen në shtëpi, ishte meritë e tyre që na mundi. E kishim thënë që me një kundërshtar të fortë si Flamurtari, gjithçka do vendosej pas 180 minutash. Ne e respektojmë kundërshtarin, besuam deri në fund dhe ia arritën.

Momenti për të fituar kupën?

Është momenti i duhur. Kemi bërë një rrugëtim të gjatë edhe në Europë, edhe në kampionat, tani edhe në Kupë. Do thosha se ky lloj rrugëtimi nuk ka pasur oshilacione, ka pasur disa momente të izoluara, nga situata që po kalon klubi me UEFAn. Jemi në vitin e duhur për t’i çuar në Korçë të dyja trofetë. Ai qytet i mrekullueshëm dhe ata tifozë e meritojnë.

Stimul më shumë për Dajën?

Objektivi ynë kryesor është fitimi i kampionatit, dhe i dyti, është Kupa. Kam qenë 2 herë në gjysmëfinale, një herë në finale vjet, dhe tashmë ka ardhur momenti ta bëj këtë trofe pjesë timen personale, por edhe të Skënderbeut.

Kë do donit në finale, Laçin që kaloi, apo Kukësin?

Edhe pse është eliminuar edhe Kukësi edhe Vlora, kanë bërë mirë deri tani. Nuk kishim ndonjë preferencë, jemi të kënaqur, çdo ekip që do kishim përballë, do na vinte në vështirësi. Atë rrugëtim që kemi bërë ne, e ka bërë edhe Laçi me kalimin në finale.

Shehi shumë aktiv në pankinë, trajneri i dytë?! Si e sheh Shehin e së ardhmes…

Shehi është krahu ynë i djathtë, është kapiteni i ekipit dhe është pjesë e stafit. Sot ishim të shtuar në staf, pa mohuar meritat e ndihmësve të mi. Kur motivimi vjen nga brenda, nga lojtarët e fushës, motivimi rritet akoma më shumë. Duhet ndonjëherë edhe një lojtar që luan në fushë, pasi ne ndonjëherë rrëmbehemi. Ne për momentin e duam në fushë, nuk duam ta lëmë të bashkohet me stafin.

Kritikuat Osmanin për një rast që bëri

Ishte orientim i yni. Pjesën e parë nuk e zhvilluam shumë të mirë. Në momentin e parë që fituam mbrapa shpinën, arritëm tek goli i parë. Sulmuesve të krahut i kërkuam gjatë javës topat pas shpine. Mbrojtësat e krahut kishin distancë të madhe me qendrat që markonin Souen, dhe ishte në efiçencë 100%. Prandaj e kam evidentuar dhe gjatë lojës.

Koment për dorëheqjen e Duros…

Më vjen keq, sepse përveç se jemi kolegë, jemi edhe miq prej kohësh. Jo Shpëtimin që e kam mik, por për çdo trajner nuk më vjen mirë.

NDIQE LIVE "PANORAMA TV" © Panorama.al

Te lidhura