Një vajzë e re përpiqet të gjejë shtegun e jetës së saj përmes parfumesh. Çdo njeri ka parfumin e vet, një aromë lëkure, por edhe një tjetër që i shkon, erë luleje, myshku, druri, deti… Dhe, nëse jeta dikur do ta gënjente, nuhatja e saj, jo. Parfumi nuk do ta gënjente kurrë. “Shtegu i parfumeve”, kështu titullohet romani i botuar nga shtëpia botuese “Dituria”, i promovuar vetëm pak ditë më parë në Tiranë, nga vetë autorja, shkrimtarja italiane Cristina Caboni. Një libër, që u bë i famshëm përpara se të botohej dhe i janë blerë të drejtat e autorit në 23 shtete. E rritur në një familje bletërritësish, një njohëse e sekreteve të bletëve e më së shumti të mbretëreshave, gjithë jeta e Cristina Caboni-t është e lidhur ngushtësisht me aromat e luleve. Dhe ishte pikërisht aty, mes këtij erëmimi që lindi edhe romani “Shtegu i parfumeve”. Edhe pse ajo nuk është Elena, heroina e romanit, në të ka shumë elemente autobiografike. Sipas studiueses Lili Sula, libri është pritur mjaft mirë nga lexuesi, çka do të thotë se ai e ka përmbushur fare mirë horizontin e pritjes. Një libër me një receptim masiv dhe ku e gjejnë veten të gjithë. Sipas Sulës, Caboni ka ditur të sjellë histori të së përditshmes, përzier me erëra parfumesh. Këtë e dëshmon edhe mënyra e ndërtimit të librit, i ndarë në 24 kapituj, ku secili mban një emër luleje, e cila ka një domethënie të vetën. 
E magjepsur nga aroma, por edhe nga gjuha e luleve, Cristina Caboni e gjeti veten të magjepsur edhe pas personazhit të librit të saj, Elenës, e cila zgjedh një mënyrë të veçantë për të komunikuar me njerëzit, e cila e ndihmon të gjejë shtegun e saj në jetë. Për shkrimtaren bletërritëse ose anasjelltas, “Shtegu i parfumeve” është një kthim në të shkuarën, por edhe një solidaritet mes grave, të cilat kur bëhen bashkë, mund t’ia dalin mbanë.
