Anisakis eshte nje parazit që gjendet në barkun e peshkut. Peshqit më të rrezikuar janë: sardelet, qefulli, toni, peshku shpate, peskatriçe etj. Japonia është vendi ku çdo vit ka më shumë viktima nga krimbi Anisakis në stomak. Vitet e fundit në Shqipëri është rritur shumë konsumimi i peshkut të papjekur (krudo), sa që të duket sikur është një traditë shqiptare ndër shekuj! Konsumimi i krudove të paripunuara po bëhet një praktikë gjithnjë e më e rrezikshme.
Në Shqipëri, ky është një ndër ushqimet më të preferuara në restorante me bazë peshku. Por sa të informuar dhe të mbrojtur jemi nga rreziqet që vijnë nga konsumimi i këtij lloj ushqimi?! Duhet thënë që jemi mjaft të rrezikuar.
Konfirmimi i këtij fakti vjen nga Organizata Ndërkombëtare e Ushqimit dhe Mikrobiologjisë, e cila bazuar në një studim nga kërkues spanjollë, raporton se, nëse konsumojmë krudo të papërpunuara, ekziston rreziku për marrjen e infeksioneve të rënda për shkak të parazitit Anisakis (që shkakton çrregullime shumë të rënda dhe që është e vështirë më pas ta çrrënjosësh nga zorrët e njeriut, duke çuar edhe deri në vdekje) Më konkretisht, cili është efekti i krimbit Anisakis që gjendet rëndom te peshku?
Me sa kam vënë re unë personalisht, në restorantet shqiptare, një përqindje shumë e vogël kanë “Abatitore”, një mjet që shërben për ngrirjen e produktit në temperatura minus 20 gradë. Dhe ato që e kanë dhe që unë kam pas mundësinë të flas personalisht, më thonë që klienti shqiptar është më i interesuar për “freskinë” e peshkut, sesa interesohet që peshku të kalohet në “Abatitore”, duke e çuar në një temperaturë minus 15 gradë për 96 orë, temperaturë e cila eliminon parazitin Anisakis dhe rreziku për shëndetin të eliminohet.
Në Itali, për shembull, një ligj i vitit 1992 ndalon përpunimin e peshkut krudo në restorante, nëse nuk kanë mjetet e nevojshme për zhdukjen e rrezikut Anisakis. Dhe në vitin 2003 është e vendosur me ligj informimi me shkrim në meny, që peshku i cili serviret krudo përpunohet sipas ligjit.
Në Shqipëri, shumë restorante nuk e njohin fare këtë aparaturë, kaq të nevojshme për jetën e çdo konsumatori. Duhet pasur parasysh se, Anisakis ngordh nëse do e vendosim për 96 orë në – 15° C, 60 orë ose -20° C, 12 orë ose -30° C, 9 orë ose -40° C. Ose duke e pjekur në forma të ndryshme, ku temperatura e nxehtësisë duhet të fillojë nga minimumi 70 gradë. Unë e di sa e vështirë është të aplikosh një sistem të tillë në një restorant, sepse unë kam një hapësirë dhe një person që merret vetëm me përpunimin e krudove.
Por besoj që, ne që merremi me përpunimin e ushqimit, duhet të informojmë klientët për rrezikun që vjen nga konsumimi i peshkut krudo dhe pasojat e tij.
Kek kokosi
Përgatitja:
Bluajeni në mikser miellin e kokosit, që të bëhet më i imët. Përzieni me shpejtësi miellin e grurit me atë të kokosit dhe gjalpin e ftohtë e të coptuar, në mënyrë që të bëhet një përbërje e shkrifët. Bashkoni me sheqerin, vezën, dy zarfet e vaniljes, kripën, majanë pluhur të posaçme për ëmbëlsira. Formoni një topth, mbështilleni me letër-film kuzhine dhe lëreni të pushojë për rreth 2 orë.
Hapeni brumin në një trashësi rreth 1/2 cm, duke bërë me miell planin e punës dhe sipërfaqen e brumit. Bëni disa yje me madhësi zvogëluese. Nëse s’keni forma, bëni disa yje kartoni, vërini mbi brumë dhe pritini me thikë sipas perimetrit të çdo ylli. Futini në furrë të nxehur më parë 180 gradë, për 10-15 minuta.
Lërini të ftohen. Vendosni yjet në pjatë mbi njëritjetrin duke filluar nga më i madhi te më i vogli, duke i rrotulluar këndet, si në figurë. Fiksojini dhe zbukurojini me sheqer pluhur.
Përbërësit për 10 persona:
1 lugë maja birre me aromë vanilje; Sheqer pluhur; 270 gr gjalpë; 120 g. miell kokosi; 480 g. miell gruri; 1 majë luge kripë; 1 vezë; 240 g. sheqer; 2 zarfe vanilie
Caneloni vegjetarian
Së pari, kjo recetë bën mirë për detoksifikim nga toksina e mishit. Falë pranisë së isoflavonit të sojës, receta është e përshtatshme edhe për femrat në periudhë paramenstruale apo në kohë menopauze.
Përgatitja:
Hedhim canelonit në ujë të valuar me kripë dhe i lëmë të ziejnë pak. I ftohim më pas në ujë të ftohtë. Presim qepën hollë bashkë me karotat dhe selinon dhe i hedhim në një tigan me vaj ulliri për t’i skuqur. Pak më pas shtojmë edhe miellin e sojës. Pasi t’i përziejmë mirë, bashkojmë edhe salcën e domates.
Tashmë raguja e canelonit është gati. Vijojmë me mbushjen, i vendosim në tavë dhe i fusim në furrë për 15-20 minuta. Përpara se t’i shërbejmë, shtojmë mbi to edhe pak salcë domatesh dhe, sipas preferencës, pak djathë të grirë.
Përbërësit (2 persona):
6 caneloni; 2 karota; 1 degë selino; 150 gr miell sojël; Salcë domatesh; 1 qepë; vaj ulliri
Qofte me patate dhe salmon
Përgatitja:
Përziejini të gjithë përbërësit e sipërpërmendur në një enë duke i kthyer në një masë kompakte. Shiheni me sy për sasinë e bukës që ka nevojë, në mënyrë që brumi të mos jetë i lëngshëm. Hidhni pak vaj në tavë dhe vendosni në të format e qofteve, që mund të jenë si t’i preferoni. Mund t’i lyeni sipër me një furçë kuzhinë, me pak të verdhë vezë, por kjo ngelet preferenciale.
Përbërësit:
Patate; Salmon; Hudhër; Vezë; Pak bukë e grirë; Kripë; piper; arrë moskat; majdanoz
NDIQE LIVE "PANORAMA TV" © Panorama.al
