Komisioneri i Bashkimit Evropian për Fqinjësi dhe Zgjerim, Oliver Varhelyi në një turne nëpër Ballkanin Perëndimor solli vaksinat e para, donacion i BE-së. BE-ja do të ndajë 651 mijë vaksina Pfizer-BioNtech për Bosnjën, Shqipërinë, Maqedoninë e Veriut, Kosovën, Malin e Zi dhe Serbinë.
Vaksina do të shpërndahen deri në muajin gusht. Komisioneri e filloi turneun në Beograd të hënën, ku blloku do të dërgojë numrin më të vogël të vaksinave, rreth 30 mijë, për shkak se Serbia deri tani paraqitet me një situatë më mirë me furnizimin dhe vaksinimin e popullatës.
Të martën në Sarajevë zoti Varhelyi tha se “ishte një ditë e madhe për Bosnje-Hercegovinën”, së cilës do t’i jepen 200 mijë vaksina “për imunizimin e punonjësve të shëndetësisë të vijës së parë të frontit”, siç u shpreh ai.
Zoti Varhelyi u ndal më pas në Podgoricë të Malit të Zi. Gjatë qëndrimit të tij të shkurtër në Mal të Zi, zoti Varhelyi tha gjithashtu se Bashkimi Evropian po shqyrton mënyra për të ndihmuar këtë vend që të trajtojë një hua për ndërtimin e një autostrade, prej 1 miliard dollarësh të marrë nga Kina, e cila po kërcënon të mbysë ekonominë e këtij vendi. Ndërsa tha se BE-ja nuk merret me “pagimin e huave të marra nga aktorë të tjerë”, zoti Varhely tha se rifinancimi ose modele të tjera financiare, mund të jenë një zgjidhje.
Mali i Zi do të marrë nga BE deri në muajin gusht 42,000 vaksina të Pfizer-it, pasi ka marrë më parë nga Kina të 200,000 doza të Sinopharm-it që i mundësuan autoriteteve shëndetësore të fillonin programin e vaksinimit masiv të martën.
Ai shkruante në Twitter se: ”Ndarja e vaksinave konfirmon zotimin tonë të vazhdueshëm në sigurimin e mbështetjes, siç kemi vepruar që nga shpërthimi i pandemisë”.
NDIQE LIVE "PANORAMA TV" © Panorama.al