Një ish -sekretare në një kamp përqendrimi nazist është kapur pasi u përpoq të arratisej përpara gjyqit të saj në Gjermaninë veriore.
Irmgard Furchner, 96 vjeç, do të gjykohej për pjesëmarrje në 11,000 vrasje, por nuk u paraqit përpara gjykatës, ndaj kjo e fundit lëshoi një urdhër arresti ndaj saj.
Sipas BBC, 96-vjeçarja ishte zhdukur nga një azil ku qëndronte në qytetin e Quickborn, por policia arriti ta lokalizojë dhe ta arrestojë disa orë më vonë. Ajo kishte ikur në Hamburg, ku u kap në një rrugë lokale.
Zëdhënësja e gjykatës, Frederike Milhoffer u shpreh se e moshuara kishte marrë një taksi, teksa nuk dihet ende nëse ka pasur persona që e kanë ndihmuar të largohet.
Gruaja u transferua për t’u marrë në pyetje në stacionin policor të lagjes Langenhorn dhe me sa duket do t’i dorëzohet drejtësisë që duhet ta procedojë atë në atë që është me sa duket gjykimi i fundit që do të mbahet në Gjermani për krimet e nazizmit.
Irmgard Furchner punoi në rininë e saj si sekretare për menaxhimin e kampit të përqendrimit Stutthof midis qershorit 1943 dhe prillit 1945, deri në mbylljen e tij për shkak të mbërritjes të Ushtrisë së Kuqe dhe pak para marrjes së Berlinit nga trupat sovjetike.
Prokuroria e konsideron atë një bashkëpunëtore në vrasjen sistematike të të burgosurve në atë kamp, pasi ajo kaloi nëpër duart e saj praktikisht të gjitha dokumentet e krijuara nga drejtuesit e qendrës.
NDIQE LIVE "PANORAMA TV" © Panorama.al
