Partia Demokratike ka miratuar dje 33 kryetarët e grupeve të punës, të cilët do të drejtojnë procesin e përzgjedhjes së kandidatëve për 61 bashkitë e vendit. Burimet në PD thanë se janë ende pa u zgjedhur kryetarët e grupeve të punës për 28 njësi zgjedhore.
Për Bashkinë e Tiranës, PD ka vendosur të ngrejë 11 grupe pune të cilët do të kryesohen nga Edi Paloka, ndërsa deputetët e tjerë do të kryesojnë një nëngrup i cili do të ketë nën administrim territorin e një minibashkie.
TIRANA
Përzgjedhja e kandidatit për Bashkinë e Tiranës dhe kandidatëve për Këshillin Bashkiak do të drejtohet nga nënkryetari i PD-së Edi Paloka. Ndërsa veç deputetëve të zgjedhur në kryeqytet, pjesë e grupit të punës do të jenë dhe deputetët Genc Ruli dhe Eduard Selami. Pavarësisht se Ruli është zgjedhur deputet në Gjirokastër, ai do të drejtojë një grup pune për përgatitjen e fushatës në kryeqytet, ashtu si dhe Selami, i cili është zgjedhur deputet në Librazhd.
RRETHET
Në miratimin e krerëve të grupeve, Basha ka vendosur të lëvizë një pjesë të mirë të deputetëve nga zonat e tyre të influencës apo dhe nga zonat ku janë zgjedhur deputetë. Astrit Patozi tashmë është vendosur të kryesojë grupin e punës në Vorë, ndërsa Arben Imami do të mbulojë zonën e Shkodrës, ku më parë ka mbuluar Elbasanin. Oerd Bylykbashi do të monitorojë procesin në Lushnjë, ndërsa zona e Durrësit do të jetë nën mbikëqyrjen e Edmond Spahos.
Burimet thanë se Bylykbashi pritet të mbulojë dhe një zonë të Durrësit. Zona është ndryshuar edhe për Genc Pollon i cili do të koordinojë procesin në zonën e Fierit, ndërsa në Berat është vendosur Fatbardh Kadilli. Enkelejd Alibeaj duket se nuk ka lëvizur shumë prej zonës së tij, duke mbuluar Memaliajn dhe Tepelenën. Lëvizja e Genc Rulit prej Gjirokastrës është mbuluar me Tritan Shehun.
Për sa i përket Dropullit, selia blu ka vendosur Spiro Kserën të drejtojë përzgjedhjen e kandidatëve. Pritet që kryesia e PD-së të diskutojë dhe për 28 grupet e punës që do të ngrihen për bashkitë e mbetura. Sipas udhëzimit të Bashës, grupet e punës duhet të ngrihen brenda datës 28 shkurt dhe brenda 10 marsit do të duhet të paraqesin pranë kryesisë së PD-së emrat e kandidatëve për të 61 bashkitë e vendit.
DETYRA
Në urdhrin 1, të datës 18.02.2015, kryetari I PD-së Lulzim Basha ka përcaktuar detyrat që do të kenë grupet e punës. “Drejton procesin e identifikimit të kandidaturave për njësitë vendore. Harton strategjinë elektorale për njësinë vendore/ zgjedhore në bashkëpunim edhe me strukturat e PDSHsë”, thuhet në urdhrin e Bashës. Po ashtu, grupi i punës do të përcaktojë dhe programin që do të ndjekin degët e PD-së në startimin e fushatës elektorale. Një tjetër detyrë e grupit të punës do të jetë “verifikimi i të gjitha raportimeve të seksioneve dhe grupseksioneve përkatëse”.
Jozefina Topallidhe Mesila Doda kanë mbetur jashtë listës së 33 emrave për drejtimin e grupeve të punës në përzgjedhjen e kandidatëve për zgjedhjet e 21 qershorit. Procesin e përzgjedhjes së emrave që do të hyjnë në garën për Shkodrën do ta drejtojë Arben Imami. Po ashtu, ishnënkryetarja e Partisë Demokratike nuk është vendosur as në drejtimin e fushatës në kryeqytet. Ndërkohë që ende nuk është bërë e ditur se cili do të jetë roli i Topallit në këtë fushatë zgjedhore. Duket se vendimi i Topallit për dorëheqjen e parevokueshme nga funksionet në selinë blu ka ndikuar dhe në qëndrimin e saj, larg procesit të organizimit të fushatës së zgjedhjeve për pushtetin vendor.
EMRAT
TIRANA
Edi Paloka
Jorida Tabaku
Florjon Mima
Majlinda Bregu
Gert Bogdani
Genc Ruli
Albana Vokshi
Myqerem Tafaj
Eduard Selami
Kastriot Islami
Halim Kosova
RRETHET
Shkodër Arben Imami
Lezhë Aldo Bumçi
Dibër Sherefedin Shehu
Durrës Edmond Spaho
Lushnjë Oerd Bylykbashi
Fier Genc Pollo
Vlorë Arben Ristani
Berat Fatbardh Kadilli
Gjirokastër Tritan Shehu
Kavajë Eduard Halimi
Vorë Astrit Patozi
Peqin Keltis Kruja
Sarandë Osman Metalla
Pogradec Gjergji Papa
Librazhd Luçiano Boçi
Mallakastër Bedri Mihaj
Divjakë Kozma Dashi
Tepelenë Enkelejd Alibeaj
Memaliaj Enkelejd Alibeaj
Krujë Gent Strazimiri
Gramsh Irena Progni
Vau i Dejës Gjoke Uldedaj
Përrenjas Eris Hoxha
Kolonje Leonard Olli
Bulqize Roland Keta
Klos Bedri Hoxha
Roskovec Bedri Mihaj
Patos Bedri Mihaj
Selenice Edvin Kulluri
Ure Vajgurore Astrit Veliaj
Libohove Tritan Shehu
DropullSpiro Ksera
NDIQE LIVE "PANORAMA TV" © Panorama.al