Basha pas bisedës me Komisionerin e BE: Plotësimi i 15 kushteve do sjellë nisjen e negociatave dhe mirëqenien ekonomike për familjet shqiptare

Mar 26, 2020 | 19:03
SHPËRNDAJE

Kreu i PD-së, Lulzim Basha, ka zhvilluar sot një video-konferencë me Komisionerin për Zgjerimin në Bashkimin Europian, Oliver Varhelyi, ndërsa detaje të bisedës së zhvilluar i tregoi në një lidhje live nga selia e PD-së.

Kreu i PD-së, tha se i kishte Varhelyi se opozita dhe Partia Demokratike, do të bëjmë gjithçka për të kontribuar për plotësimin e 15 kushteve, për hapjen e negociatave.

basha pd

Po ashtu kreu i opozitës u shpreh se kishte kërkuar edhe që të shihet çdo mundësi për të shtuar ndihëm që BE i dha Shqipërisë në luftën kundër koronavirusit.

Nuk jemi vetëm. Pavarësisht ditëve të vështira që po kalojmë, të jeni besimplotë se ditë më të mira do të vijnë për ju, për familjet tuaja dhe për Shqipërinë”, shkruan mes të tjerash Basha.

Deklarata e plotë:

Të dashur bashkëqytetarë!

Sapo përfundova një video-konferencë me Komisionerin për Zgjerimin në Bashkimin Europian, Oliver Varhelyi.

E falenderova atë dhe Bashkimin Europian për shprehjen e vullnetit pozitiv për hapjen e negociatave me Shqipërinë, pas përmbushjes së 15 kushteve. E garantova se opozita, Partia Demokratike dhe unë personalisht, do të bëjmë gjithçka që është në dorën tonë për të kontribuar për plotësimin e këtyre kushteve.

Plotësimi i 15 kushteve dhe zbatimi i reformave të nevojshme për këtë, do të sjellin jo vetëm hapjen e negociatave, por edhe forcimin e shtetit të së drejtës dhe rritjen e mirëqenies ekonomike për çdo familje shqiptare.

Komisionerin dhe Bashkimin Europian i falenderova edhe për ndihmën që i akorduan Shqipërisë për të përballuar pasojat e koronavirusit, dhe i kërkova të shohin çdo mundësi për ta shtuar këtë ndihmë, pasi përveç pamundësisë për plotësimin e nevojave në shëndetësi, Shqipëria është një vend me nivel të lartë varfërie dhe e ka të domosdoshme mbështetjen për familjet në nevojë, për shtresat në nevojë, për biznesin dhe për ekonominë.

I kërkova, po kështu, edhe mundësinë e rialokimit të fondeve brenda instrumentit të paraaderimit, që njihet si IPA, në drejtim të tre prioriteteve kryesore:

  1. Mbështetje për shëndetësinë.
  2. Mbështetje sociale për njerëzit në nevojë.
  3. Mbështetje për biznesin dhe ekonominë shqiptare.

Po kështu i kërkova komisionerit të bëjnë gjithçka për të na ndihmuar edhe me instrumentet e tjera në dispozicion të Bashkimit Europian, si Banka Europiane e Investimeve dhe Banka Europiane për Rindërtim dhe Zhvillim.

Të dashur bashkëqytetarë!

Nuk jemi vetëm.

Pavarësisht ditëve të vështira që po kalojmë, të jeni besimplotë se ditë më të mira do të vijnë për ju, për familjet tuaja dhe për Shqipërinë.

NDIQE LIVE "PANORAMA TV" © Panorama.al

Te lidhura