Kryetari i Partisë Demokratike, Lulzim Basha ka folur nga SHBA për miratimin e shtatë ligjeve që pason miratimin e ndryshimeve kushtetuese për reformën në drejtësi dhe që u miratuan me konsensus të plotë në Parlament.
Basha gjatë një interviste për “Zërin e Amerikës” theksoi se, kalimi i ligjeve nuk mund të bëhet pa respektuar afatet Kushtetuese që nuk e lejojnë miratimin nesër në Parlament të ligjit. Por, kreu i PD-së tha se opozita është e gatshme për të marrë në shqyrtim draftin për Vetingun që të mos ketë asnjë vonesë në miratim. Nga ana tjetër, Basha foli për një “hile” nga ana e Partisë Socialiste.
“PD ka shprehur gatishmërinë për të shqyrtuar ligjin e Vetingut me ekspertët e saj në mënyrë që të mos ketë asnjë vonesë në miratimin e saj. Mazhoranca i është përgjigjur kësaj me një hile, e cila tashmë është sqaruar, është një furtunë në një gotë uji. Pretendohet se drafti ka qenë gati më 4 korrik, ndërkohë që drafti zyrtarisht është përcjellë mbrëmë vonë”, tha Basha.
Sipas liderit të PD-së ajo që po konsiderohet si ‘prishje e konsensusit për reformën në drejtësi’ nuk është gjë tjetër veçse një “manovër e qartë politike, e tipit që pengoi deri në çastin e fundit konsensusin me PD-në”.
“Opozita ka qenë dhe është e gatshme të sakrifikojë për të kontribuar në përfundimin e procesit të reformës në drejtësi. mazhoranca të mos punojë me hile, por me transparencë dhe vullnet. PD ka marrë dhe do të vazhdojë të marrë përgjegjësinë e saj. Shoh përpjekje për të rikthyer tensionin nga të njëjtët që tentuan të përjashtojnë opozitën nga procesi”, tha ai.
Kryetari i PD-së në fund tha se tashmë sfida e opozitës është për garantimin e zgjedhjeve të lira dhe të ndershme dhe për këtë kërkoi ndihmën dhe mbështetjen e ndërkombëtarëve.
NDIQE LIVE "PANORAMA TV" © Panorama.al
