Avokati i deputetit Tom Doshi, Vladimir Meçi, pranoi se policia gjatë kontrollit të ushtruar në shtëpinë e klientit të tij, ka sekuestruar një laptop dhe një Usb. Në një intervistë telefonike të dhënë mbrëmjen e së enjtes për emisionin “Opinion” në “Tv Klan”, Meçi tha se në laptopin e sekuestruar nga policia, deputeti Doshi komunikonte me mbrojtësit e tij ligjor. “Një USB dhe një laptop për të cilin komunikonte me avokatin e tij. Aty janë të gjitha materialet e kohëve të fundit mes avokatëve dhe zotit Doshi”, deklaroi Vladimir Meçi.
Avokati tha se deputeti Tom Doshi pas ndalimit të tij nda policia pasditen e së enjtes, nuk është marrë në pyetje. Sipas avokatit Vladimir Meçi, prokuroria në vendimin e saj kaloi kompetencat. Pyetjes se si do të veprohet pas vendimit të Gjykatës, avokati tha se nëse vendimi i ndalimit do të shpallet i pavlefshëm, atëherë deputeti do të jetë i lirë, ndërsa prokurori mund të ketë penalitete deri në pezullim nga detyra.
Intervista e avokatit të Tom Doshit Vladimir Meçi në “Opinion”:
Sot u kërkua leje për kontroll dhe arrestimin e Tom Doshit. A pati një procesverbal?
Në momentin kur Kuvendi sot dha lejen për kërkesën e Prokurorisë së Përgjithshme, qoftë për zotin Doshi dhe zoti Frroku… urdhri i nxjerrë për ndalimin e zotit Doshi është në tejkalim të kompetencave, është i kundra ligjshëm…
Nëse gjykata e quan ndalimin të paligjshëm çfarë ndodh?
Do të lirohet menjëherë. Nëse vendimi cilësohet i paligjshëm, prokurori përballet deri me pezullim nga detyra.
Kur pritet të jetë ky vendim i gjykatës?
Kështu siç e ka ndërtuar prokuroria, do ta paraqesë brenda 48 orësh.
Të hënën?
Si rregull prokuroria zgjedh të premten e zezë.
Ka pasur procesverbal në kontrollin e sotëm të banesës?
Kontrolli është bërë pa një urdhër të prokurorit dhe nuk duhej një urdhër i prokurorit, por një vendim gjykate.
Por këtë ia kishte kërkuar edhe Kuvendit?
Kuvendit i kishte kërkuar leje dhe nga ky moment duhet të kryente një procedurë të caktuar.
Çfarë ka ndodhur?
Punonjësit e policisë kanë zhvilluar një procedurë korrekte.
Çfarë kanë dorëzuar?
Një USB dhe një laptop për të cilin komunikonte me avokatin e tij. Aty janë të gjitha materialet e kohëve të fundit mes avokatëve dhe zotit Doshi.
Ku do të qëndrojë Doshi pas kësaj ngjarjeje?
Do të qëndrojë në ambientet e policisë.
Komunikon me zotin Frroku?
Besoj se janë në ambiente të ndara.
E kanë marrë në pyetje?
Deri më tani nuk është marrë në pyetje.
NDIQE LIVE "PANORAMA TV" © Panorama.al