Prokuroria e Tiranës ka zbardhur të dhëna të reja në lidhje me vrasjen e dyfishtë të ndodhur mbrëmjen e 1 tetorit në kryeqytet, ku dy të rinj u ekzekutuan me armë zjarri te lulishte “1 Maji”.
Sipas dëshmisë së dhënë nga një vajzë 18-vjeçare që është gjetur në banesën e tij, Elvis Gaçaj dyshohet se i përdorte vajzat e reja për shpërndarje droge në kryeqytet. Po kështu, referuar dëshmisë së dhënë nga vajza, të cilën policia e gjeti në banesën e Elvis Gaçajt (ai paguante qiranë), 40-vjeçari që mbeti i plagosur në atentatin ndaj tij furnizonte me drogë dhe më armë shtetasin Kevin Rugova.
Dëshmitarja ka pretenduar se disa herë ka qenë prezente kur Gaçaj i ka dhënë drogë dhe armë të riut Kevin Rugova, i cili mbeti i vrarë mbrëmjen e 1 tetorit pasi ndodhej në makinën e Elvis Gaçajt.
“Ai sillte drogë herë pas here dhe pasi e peshonte, e ndante në doza dhe përcaktonte më pas kush do ta shiste në lokalet e ish-bllokut”, ka thënë 18- vjeçarja.
Ja si përshkruhet ngjarja nga ana e prokurorisë, bazuar në hetimet e kryera deri pas dhënies së masës së sigurisë nga gjykata për dy të arrestuarit, Sael Sulaj dhe Vasiel Çavo, si dhe për Elvis Gaçajn që është lënë në arrest me burg për akuzën e mbajtjes e shitjes së drogës.
NGJARJA
Hetimet e deritanishme provojnë se më 1 tetor 2015, rreth orës 19:45, në sheshin mes pallateve afër lulishtes “1 Maji” është qëlluar me armë zjarri në drejtim të një autoveture të markës “BMW”, seria 5, ngjyrë gri e metaltë, në të cilën sapo kishin hipur dhe po largoheshin shtetasit Elvis Gaçaj, drejtues, Aurora Oskian, pasagjere në vend të parë, Kevin Rugova dhe E.GJ., pasagjerë në ndenjësen e pasme, të ulur përkatësisht pas Aurorës dhe Elvisit. Nga goditjet me breshëri me armë që mendohet të jenë kallashnikovë, janë vrarë në vend Kevin Rugova dhe Aurora Oskian, të dy të ulur në krahun e djathtë të mjetit, është plagosur rëndë Elvis Gaçaj dhe ka shpëtuar pa dëmtime E.GJ. Elvis Gaçaj është shtruar në spital ku i është nënshtruar ndërhyrjes kirurgjikale. Menjëherë pas marrjes së këtij njoftimi, Policia Gjyqë- sore ka shkuar në vendngjarje, ku gjatë këqyrjes janë fiksuar dhe sekuestruar në cilësinë e provave materiale automjeti, i cili në xhamin e parmë dhe pjesët metalike sipër dhe anash kishte dëmtime të shumta të shkaktuara nga predha arme zjarri. Në mjet kanë qenë të vdekur dy të lartpërmendurit që janë marrë pas këqyrjes për ekzaminime të mëtejshme mjekoligjore; mjeti u mor më pas për këqyrje më të hollësishme në mjediset e DPQ Tiranë.
HETIMET
Hetimet e para treguan që në mbrëmjen e datës 01.10.2015, Kevin Rugova, Elvis Gaçaj, Aurora Oskian dhe E.GJ. kanë lëvizur së bashku me automjetin e markes “BMW”, me targa “AA xxx JS”, të drejtuar nga Elvis Gaçaj. Pasi kanë parkuar automjetin në rrugën “Beqir Rusi”, pranë lulishtes “1 Maji” Tiranë, ata janë ulur për të darkuar së bashku në një lokal aty pranë, ku kanë qëndruar për rreth gjysmë ore. Pasi janë ngritur, personat e lartpërmendur janë drejtuar për te mjeti “BMW”. Elvisi është ulur në timon, Aurora në ndenjësen e parë nga ana e pasagjerit, ndërsa Kevini dhe E.GJ. janë ulur në ndenjëset e pasme të mjetit. Sapo mjeti ka nisur lëvizjen, dy veta kanë qëlluar me armë zjarri në drejtim të mjetit. Si pasojë e të shtënave kanë mbetur të vrarë shtetasit Kevin Rugova dhe Aurora Oskian, është plagosur rëndë Elvis Gaçaj, ky i fundit është transportuar në Spitalin Ushtarak Tiranë në gjendje kritike për jetën; ndërsa E.GJ. nuk ka pësuar dëmtime. Pasi kryen vrasjen, autorët janë larguar më këmbë në rrugicat e lagjes, duke iu shmangur ndjekjes së policisë.
PROVAT
Gjatë kontrollit të territorit përreth vendit të ngjarjes dhe drejtimit nga mendohet se janë larguar autorët, në bulevardin “Bajram Curri” në skarpatin e lumit të Lanës është gjetur, fiksuar dhe sekuestruar në cilësinë e provës materiale një çantë me ngjyrë të kuqe me dy rrota plastike, ku brenda saj u gjet një kapele sportive me ngjyrë blu me strehë, si dhe një medaljon meshini me ngjyrë qielli-blu-rozë-zezë. Nga Policia Gjyqësore u sekuestrua në cilësinë e provës materiale një predhë, e cila u fiksua gjatë këqyrjes së vendit të ngjarjes në makinën e shtetasit A.Z. Po kështu, nga kontrolli i ushtruar në lumin Lana, midis dy urave lidhëse në afërsi të Gjykatës së Rrethit Gjyqësor Tiranë është bërë e mundur që në rrjedhën e lumit polumbarët e repartit RENEA të gjejnë një armë zjarri tip automatik, model 56, kalibër 7.62 mm, me numër xxxxx, që u sekuestrua në cilësinë e provës materiale. Nga këqyrja e automjetit të markës “BMW”, me targa AAxxxJS, u konstatuan disa dëmtime të shkaktuara nga depërtimi i predhave të armëve të zjarrit, si dhe në sipërfaqen e brendshme u gjetën dhe sekuestruan në cilësinë e provës materiale një predhë model 54, një bërthamë predhe, dy këmishëza predhe, një palë tuta sportive me ngjyrë blu të errët, katër tamponë të marrë me mbetje biologjike me ngjyrë të kuqe si ajo e gjakut, gjashtë tamponë me mbetje biologjike, ndërsa në pjesën e jashtme të automjetit u fiksuan tri gjurmë papilare. Po kështu, Policia Gjyqësore kreu sekuestrimin në cilësinë e provës materiale të pamjeve filmike të disa subjekteve private, pranë vendit të ngjarjes dhe përgjatë itinerarit që mendohet se kishin përshkruar autorët pas kryerjes së krimit. Në një banesë pranë vendit të ngjarjes u mor dhe u administrua një DVR me regjistrime filmike të kamerave që mbikëqyrin mjedisin pranë vendit të ngjarjes. Kjo pajisje u dërgua për ekzaminime të mëtejshme në D.P.SH. Tiranë. U pyet në spital i dëmtuari Elvis Gaçaj, por për shkak të gjendjes së rënduar shëndetë- sore nuk iu morën dot shpjegime për ngjarjen. Gjatë ndë- rhyrjes kirurgjikale, nga trupi i tij mjekët nxorën dy këmishë- za copëza predhe arme zjarri, të cilat së bashku me teshat që i dëmtuari mbante u sekuestruan si prova materiale.
TREGTIA E DROGËS
Nga hetimet paraprake rezulton që viktima Kevin Rugova dhe i dëmtuari Elvis Gaçaj janë persona me precedentë penalë dhe kriminalë, me prirje shitjen e narkotikëve. Për këtë qëllim u ushtrua kontroll në banesën e viktimës, ku u gjet dhe u sekuestrua në cilësinë e provës materiale një peshore elektronike dhe një sasi prej 3.3 gramë kokainë. Nga të dhënat e marra në rrugë operative rezultoi se objekt i këtij sulmi kriminal ka qenë Elvis Gaçaj, person me precedentë të shumtë penalë dhe kriminalë në drejtim të trafikimit të lëndëve narkotike; ngjarja ka ardhur si pasojë e një konflikti mes tij dhe personave të dyshuar Sael Sulaj dhe Vasiel Çavo. Shërbimet e Policisë Gjyqësore arritën që në 02.10.2015 të shoqëronin në mjediset e DPQ Tiranë personat e dyshuar Sael Sulaj dhe Vasiel Çavo. Të pyetur në cilësinë e personave nën hetim, shtetasit e lartpërmendur kanë pranuar autorësinë e krimit, si dhe shpjeguan tërë mekanizmin e ngjarjes.
MOTIVI I VRASJES
Nga deklarimet e tyre rezulton që motivi i kësaj ngjarjeje është një konflikt i disa muajve më parë mes të dëmtuarit Elvis Gaçaj dhe personit nën hetim Vasiel Çavo. Elvis Gaçaj e ka rrahur shtetasin Vasiel dhe në mënyrë të përsëritur ka vijuar të fyejë dhe shajë Sael Sulajn. Mbrëmjen e datës 01.10.2015, shtetasi Sael Sulaj ka parë rastësisht në një lokal pranë lagjes ku ai banon shtetasin Elvis Gaçaj, duke darkuar me tre të tjerë. Në këtë kohë, për shkak të konfliktit të lartpërmendur, shtetasit Sael Sulaj i ka lindur mendimi që të hakmerrej ndaj shtetasit Elvis Gaçaj dhe për këtë qëllim i ka telefonuar shokut të tij Vasiel Çavo. Pasi janë takuar, Saeli dhe Vasieli kanë shkuar në shtëpinë e këtij të fundit dhe kanë marrë një armë zjarri tip automatik dhe një pistoletë. Sipas planit të thurur prej tyre, kur Elvis Gaçaj të hipte në makinë, Saeli do të qëllonte me automatik i pari, ndërsa Vasieli do të mbështeste atë me pistoletë nëse do dilte ndonjë e papritur. Në vijim të deklarimeve të tyre, të dyshuarit shpjegojnë se Saeli është pozicionuar në katin e dytë të sheshpushimit të pallatit të tij me fushëpamje nga makina e shtetasit Elvis Gaçaj, ndërsa Vasieli ka qëndruar në hyrje të pallatit. Sapo Elvisi dhe personat që e shoqëronin atë kanë dalë nga lokali dhe i janë drejtuar automjetit të tyre, shtetasi Sael ka mbushur armën automatike dhe pasi personat e lartpërmendur kanë hipur në mjet, ai ka hapur zjarr në drejtim të tyre, derisa ka mbaruar të gjithë fishekët. Menjëherë më pas, në drejtim të automjetit ka hapur zjarr me pistoletë dhe shtetasi Vasiel Çavo dhe të dy personat e armatosur janë larguar në këmbë në drejtime të ndryshme bashkë me armët e krimit. Shtetasi Sael Sulaj ka hedhur në lumin e Lanës automatikun dhe çantën që mbante atë, sende këto që janë sekuestruar tashmë si prova materiale. Po kështu, edhe shtetasi Vasiel Çavo ka kaluar në urën këmbësore të Lanës, duke hedhur në ujë pistoletën dhe kapelën që mbante në kokë. Me gjithë kërkimet e bëra, Policia Gjyqësore nuk arriti të gjejë armën pistoletë.
