Policia e Shtetit dhe Prokuroria e Krimeve të Rënda në një deklaratë të përbashkët për shtyp ka treguar detaje në lidhje me megaoperacion të zhvilluar në ditët e fundit ku ranë në pranga 27 shtetas.
“Në goditjen finale morën pjesë rreth 1.500 forca policore operacionale, FNSH, RENEA dhe nga efektivë nga Policia lokale”, u shpreh Drejtori i Policisë së Shtetit, Ardi Veliu.
Po ashtu në deklaratë Veliu tregoi dhe asetet e sekuestruara gjatë këtij operacioni të shtrirë në 12 qytete.
PJESË NGA DEKLARATA
Ndërkohë në kuadër të këtij procedimi janë arrestuar më herët edhe 12 persona për vepra të ndryshme penale që lidhen me fushën e narkotikëve.
Gjatë kontrolleve të ushtruara u sekuestruan:
- 3 pistoleta;
- 3 armë gjahu, çifte dhe fishekë;
- 1 shotgan;
- Presë për lëndë narkotike të llojit heroinë;
- Peshore elektronike;
- Sasi lëndë narkotike heroinë e kokainë;
- 13 mjete, njëri i blinduar;
- Sasi e konsiderueshme parash;
- Rreth 75 telefona celularë.
Policia e Shtetit, nën drejtimin e Prokurorisë po vijon veprimet për të zbardhur rolin dhe aktivitetin e tyre apo personave të tjerë të lidhur me ta.
Ne i sigurojmë qytetarët se do të vazhdojmë të jemi të angazhuar për të garantuar qetësi, rend e siguri, duke goditur me ashpërsinë e forcës së ligjit çdo individ të përfshirë në aktivitet kriminal. Operacioni “Forca e Ligjit” vazhdon.
NDIQE LIVE "PANORAMA TV" © Panorama.al
