FOTOT/ Anxhela Peristeri larg ekstravagancës, “Eurovizioni” e prezanton si vajza tradicionale nga Shqipëria

Feb 27, 2021 | 11:48
SHPËRNDAJE

Këngëtarja Anxhela Peristeri do të përfaqësojë Shqipërinë këtë vit në “Eurovision” si vajzë tradicionale, larg ekstravagancës.

“Karma” titullohet kënga që është përzgjedhur fituese në Festivalin e RTSH-së dhjetorin e kaluar dhe që do të jetë prezantuese e shtetit shqiptar në festivalin europian.

Teksa është duke promovuar projektin muzikor, Peristeri ka realizuar edhe disa fotografi me motive kombëtare, që do ta bëjnë edhe më të lehtë identifikimin e këngës. Këngëtarja ka pozuar me veshje tradicionale, duke pasqyruar kështu kulturën dhe traditën vendase.

Faqja zyrtare e “Eurovision”-it në “Instagram” i ka publikuar këto fotografi të këngëtares shqiptare, duke i ndarë me ndjekësit e saj të shumtë.

“Shikoni këto fotografi mahnitëse të Anxhela Peristerit, ndërsa ajo u bën dedikime shqiptarëve në të gjithë botën”, shkruan faqja zyrtare e “Eurovision”-it.

Ndërsa afrohet data e nisjes së Eurovizionit, një prej festivaleve më të rëndësishme të këngës në Europë, organizatorët e eventit janë duke punuar që t’i vënë të gjithë konkurrentët në qendër të vëmendjes së publikut, me anë të postimeve në rrjetet sociale.

Në faqen zyrtare të “Instagram”-it të Eurovizion, i cili këtë vit do të zhvillohet në Holandë pas anulimit që ndodhi vjet për shkak të pandemisë, janë duke u prezantuar artistët e të gjitha shteteve pjesëmarrëse dhe këngët e tyre.

Për Anxhelën, ata zgjodhën të publikojnë disa foto, ku këngëtarja shfaqet me kostum tradicional. Bashkëngjitur me fotot e realizuara nga Norik Uka, nuk kanë munguar tifozët e Festivalit Europian me komentet e tyre. Fotot dhe Anxhela me veshjen tradicionale duket se janë pëlqyer nga fansat e festivalit, jo vetëm ata shqiptarë.

Ndërkohë pritet që ditët e ardhshme të mësohen më shumë detaje nga netët që do të mbahet Eurovizioni, radhën e performancave, si artistët do të paraqiten dhe si do të organizohet eventi me apo pa publik. Këngëtarja Anxhela Peristeri u shpall fituese e “Festivalit të 59-të të RTSH-së” vitin që lamë pas, ku konkurroi me këngën “Karma”.

Në muajin maj të këtij viti, kjo këngë fituese do të përfaqësojë Shqipërinë në “Eurovision”, i cili do të mbahet në Roterdam. Kujtojmë që para festivalit, në media qarkulloi një lajm jo zyrtar për “fitoren e paracaktuar” të Anxhelës, që u mohua nga drejtuesit.

E ftuar në “Jonida’s Room”, Anxhela foli për herë të parë lidhur me këto fjalë pas fitores. Këngëtarja u shpreh se në fakt ka pasur reagime jo vetëm për të, por edhe për çmimin e dytë dhe të tretë. Pavarësisht kësaj, Peristeri tregoi se dëshiron që të ketë reagime sa herë që fiton, nuk e ka aspak problem dhe e kupton këtë gjë.

/Panoramaplus.al

 

NDIQE LIVE "PANORAMA TV" © Panorama.al

Te lidhura