Qyteti i Elbasanit vijon të mbetet në qendër të vëmendjes gjatë ditëve të fundit, për sa u përket ngjarjeve kriminale.
Një ngjarje e rëndë ka tronditur qytetin orët e para të mëngjesit të djeshëm, ku një 30-vjeçar është vrarë pas një sherri me shokët e tij teksa ishin duke konsumuar pije alkoolike në një lokal. Viktimë ka mbetur shtetasi Florian Lamçja, i njohur ndryshe në qytet edhe si “Flor Qorri”.
30-vjeçari është goditur me shishe qelqi dhe sende të forta nga dy shokët e tij të tavolinës, ndërsa në spital ka mbërritur thuajse pa shenja jete dhe i mbuluar me gjak. Lamçja u dërgua në spital nga dy miqtë e tij, të cilët e dhunuan më parë deri në vdekje. Por kush janë dy autorët e kësaj ngjarjeje të rëndë?
LEXO EDHE: Vrasja pas pijeve dhe shishave, flet Sokol Sanxhaktari: Ishim në disa lokale, kur u ulëm në darkë me Ardianion dhe Florianin…
NGJARJA
Tre shokët ndodheshin në ambientet e lokal “Piazza del sol”, në qendër të Elbasanit. Florian Lamçja, ose siç njihet ndryshe në Elbasan me nofkën “Flor Qorri”, Adriano Hajdari dhe Sokol Sanxhaktari, në shoqërinë e njëri-tjetrit kanë konsumuar pije alkoolike.
Një burim nga Policia tha se ata mund të kenë konsumuar edhe lëndë narkotike, fakt ky i pakonfirmuar zyrtarisht. Në bisedë e sipër, rreth orës 04:00 të mëngjesit ata janë zënë me njëri-tjetrin duke bërë që të përdorin shishet e birës dhe për pasojë kanë lënë të vdekur Florian Lamçjan. Për këtë ngjarje janë arrestuar Adriano Hajdari dhe Sokol Sanxhaktari, dhëndri i ish-kryetarit të Bashkisë së Elbasanit, Qazim Sejdinit. Dy të arrestuarit dhe vetë viktima Florian Lamçja konsiderohen si persona me precedentë penalë në Elbasan.
POLICIA
Disa orë pas ngjarjes, Policia e Elbasanit njoftoi edhe arrestimin e dy autorëve për vrasjen e 30-vjeçarit Florjan Lammçja. Burimet zyrtare të Policisë thanë se viktima së bashku me dy autorët, shokë me njëri-tjetrin, kanë qenë duke konsumuar alkool në një lokal, në qendër të qytetit.
Sokol Sanxhaktari, që është edhe dhëndri i ish-kryebashkiakut të Elbasanit, Qazim Sejdini, është vënë në pranga së bashku me Adriano Hajdarin, të dyshuar si autorët e vrasjes se 30-vjeçarit Florjan Lamçe. Pas kryerjes së veprimeve hetimore dhe marrjen e dëshmive të dy të dyshuarve, zyrtarisht Policia e Elbasanit tha se të dy ata, dyshohet se 30-vjeçarin Lamçe e kanë vrarë me dashje dhe në bashkëpunim me njëri-tjetrin, akuzë me të cilën do të përballen përpara drejtësisë.
Sokol Sanxhaktari është i njohur në Elbasan për lidhjen e tij familjare me ishkryebashkiakun Qazim Sejdini. Dhëndri i ish-kryebashkiakut është përfolur disa herë për lidhje me grupet kriminale që operojnë në këtë qytet. Ndërsa edhe viktima Florjan Lamçja rezulton një emër i njohur për drejtësinë.
NDIQE LIVE "PANORAMA TV" © Panorama.al