ARISTIR LUMEZI/ Kryetari i Grupit Parlamentar Socialist, Taulant Balla, i kërkoi dje deputetit të tij Alket Hyseni që të sqarojë deputetët dhe publikun për akuzat e ngritura nga PD-ja ndaj tij për çështje pronësie.
Gjatë mbledhjes së djeshme të Grupit Parlamentar, Balla, duke shprehur mendimin e tij, ka thënë se akuzat e opozitës ndaj deputetit Hyseni janë politike dhe nuk kanë asgjë të vërtetë.
“Sapo janë bërë akuzat e para, si nga zonja nga Dhërmiu ashtu dhe nga opozita, i kam kërkuar informacion deputetit Alket Hyseni dhe nga informacioni që kam marrë më rezulton se akuzat janë politike, ndërsa transaksionet e pronës kanë qenë konform ligjit. Por për të qenë transparentë, do t’i kërkoja deputetit Hyseni që të japë shpjegime si para deputetëve ashtu dhe për publikun, bazuar në dokumentacionin që disponon për këtë pronë”, mësohet të jetë shprehur para deputetëve kryetari i Grupit Parlamentar, Taulant Balla.
Deputeti Hyseni ka shpjeguar përpara kolegëve të tij se si e kishte blerë pronën dhe cilat kanë qenë procedurat e ndjekura.
“Zonja, e cila ka bërë akuzën publike, nuk ka asnjë të drejtë, sepse prona ime nuk ka lidhje me të. Ajo është rrëzuar 8 herë nga institucionet vendimmarrëse, ndërsa edhe kunati i saj ka dalë sot në media dhe ka hedhur poshtë pretendimet e zonjës Bua”, mësohet të jetë shprehur deputeti socialist para Grupit Parlamentar.
SQARIMI
Para deputetëve socialistë, deputeti Hyseni është shprehur se nuk e njeh zonjën dhe asnjë nga familja apo fisi i saj, me të cilët ka mësuar se është në konflikt familjar prej shumë vitesh.
“Kam shkëmbyer disa apartamente, njësi dhe garazhe të fituara para vitit 2010 nga të ardhura të ligjshme dhe të deklaruara, me një sipërfaqe toke bujqësore, të cilën e kam shitur vitin e kaluar”, mësohet të ketë sqaruar deputetët, Hyseni. Sipas tij, toka bujqësore që ai ka blerë, është fituar nga një tapi në emër të kunatit të zonjës që akuzon, e marrë para dhjetëra vitesh dhe e regjistruar me vendim gjykate.
“Është transferuar me kontratë noteriale para disa viteve te një person i tretë, përpara se të kalonte në pronësinë time të përkohshme. Nuk e njoh fare përfituesin fillestar të kësaj prone (kunati i zonjës Bua). Ndërkohë, zonja nuk ka përfituar sipërfaqe toke pasi nuk ka qenë banore e fshatit Dhërmi në vitin 1991 dhe nuk i takon sipas ligjit”, është shprehur deputeti socialist i Sarandës.
Sipas tij, nëna e bashkëshortit të zonjës, Athina Bua, ka përfituar tokë bujqësore si banore e fshatit nëpërmjet një AMTP tjetër, që ska lidhje me të kunatit.
“Janë regjistruar me vendim gjyqësor në kohën e qeverisjes së PD-së ku përcaktohet qartë se janë parcela të ndryshme. ”, është shprehur deputeti Hyseni në mbledhjen e Grupit Parlamentar.
PANORAMA
NDIQE LIVE "PANORAMA TV" © Panorama.al
