Shoqata “Bregdeti”: Jo dhënies me koncesion të plazhit të Dhërmiut
Kronike e Enjte, 20 Shtator, 2012 | 15:02 pm
Plazhi i Dhërmiut
Shoqata “Bregdeti” ka reaguar dje përmes një deklarate kundër dhënies me koncesion për 30 vjet nga qeveria shqiptare të plazheve të Dhërmiut dhe Perivollos. “Lidhur me koncesionin e dhënë nga qeveria shqiptare për firmën ‘EuroKontakt’, për shfrytëzimin për 30 vjet të plazheve të Dhërmiut dhe Perivollos, shoqëria civile himarjote deklaron se ky përbën skandalin më të madh pas shembjes së fshatit Jalë në vitin 2007 në Bashkinë e Himarës”, thuhet në deklaratën e firmosur nga kryetari i shoqatës, Niko Nesturi dhe ai i komunitetit himarjot, Stravri Marko. Shoqata kërkon transparencë nga Bashkia e Himarës, të cilën e bën përgjegjëse për miratimin unanim të planit të zhvillimit të zonës. “Dhënia e koncesioneve për të shfrytëzuar plazhet publike të himarjotëve do të konsiderohej nga ana jonë si shoqëri civile, si një ‘pushtim’ i territoreve të popullit të Himarës në emër të zhvillimeve koncesionare. Ne si komunitet kemi marrë vendimin për mosbindje civile për ligjin komunist 7501 dhe mosregjistrimi i tij, ndaj neglizhimi i Bashkisë së Himarës, e cila ka filluar regjistrimin për ‘hesap të interesit të mafies’ duke injoruar ndërkohë zërin e shoqërisë civile dhe grupeve të interesit, lind dyshime të forta”. Sipas tyre, “qeveria shqiptare, e cila është bërë shërbëtore e interesave të ‘errëta’ në Himarë për qëllime mafioze, po nxit blerjen e pronave në bregdet pa u ndarë toka dhe pa u bërë regjistrimi zyrtar, i cili është bllokuar nga OSBE”.
